Ermənistanın baş naziri Nikol Paşinyan növbədənkənar parlament seçkilərinin keçirilməsi ehtimalının azaldığını bildirib. Onun sözlərinə görə, müxalifətə Konstitusiya ilə bağlı elə bir təklif təqdim ediləcək ki, onlar bundan imtina edə bilməyəcəklər.
Modern.az xəbər verir ki, Paşinyan oktyabrın 29-da jurnalistlərlə söhbətində bu barədə danışıb.
“Ötən dəfə növbədənkənar seçkiləri mümkün ssenari kimi təqdim etmişdim. Lakin dünən hökumət saatının yekunlarına əsasən, növbədənkənar seçkilərə ehtiyac qalmayacağı ehtimalının yüksək olduğuna əmin oldum”, – deyə baş nazir bildirib.
O, növbədənkənar seçkilər əvəzinə Konstitusiya ilə bağlı təklif irəli sürüləcəyini bir daha vurğulayıb.
“Dünən hökumət saatının nəticələrinə əsasən, onlar bizə elə bir proses aparmaq imkanı yaratdılar ki, müxalifətə qarşı güclü ictimai təzyiq formalaşdıraq. Beləliklə, müxalifət öz səsverməsi ilə yeni Konstitusiya üzrə referendumun keçirilməsini mümkün etsin”, – deyə Paşinyan qeyd edib.
Ermənistanın baş naziri bununla belə, həmin təklifi hazırlaya biləcəyinə zəmanət verə bilməyəcəyini bildirib.
“Bundan artığını deyə bilmərəm”, – deyə o əlavə edib.
Paşinyanın fikrincə, müxalifəti düşündürən əsas məsələ təklif olunan addımın sülh prosesində son nöqtə olub-olmamasıdır.
