Londonun “Arsenal” klubunun müdafiəçisi Uilyam Saliba uzun fasilədən sonra məşqlərə qayıdıb.
İdman.Biz insayder Fabrizio Romanoya istinadən xəbər verir ki, dörd ay əvvəl belindən zədələnən fransalı futbolçu həmin vaxtdan bəri ilk dəfə məşq meydançasına çıxıb. Onun bərpa prosesinin son mərhələsində olduğu bildirilir.
Salibanın qayıdışı “Arsenal”ın baş məşqçisi Mikel Arteta üçün mühüm xəbərdir. Fransalı müdafiəçi komandanın müdafiə xəttində və hücumların qurulmasında əsas fiqurlardan biri hesab olunur.
Bununla belə, futbolçunun məşqlərə başlaması onun dərhal oyunlarda iştirak edəcəyi anlamına gəlmir. Klub Salibanın fiziki vəziyyətini qiymətləndirdikdən sonra meydana qayıdacağı vaxtla bağlı qərar verəcək.
