Ukrayna dronları 4 noyabr gecəsi Rusiyanın Adıgey Respublikasına hücum edib. Vilayət qubernatoru Murat Kumpilovun sözlərinə görə, dronlar əsasən Adıgeydəki "Ozon" onlayn pərakəndə satış şirkətinə məxsus logistika mərkəzini hədəf alıb.
“Telegram” kanalları və Rusiya media orqanları bildirir ki, mərkəzə pilotsuz təyyarələrin hücumu güclü yanğına səbəb olub. "Kompleksin işçiləri təxliyə edilib və hazırda itki və ya xəsarət alanlar barədə məlumat yoxdur", - deyə Kumpilov qeyd edib. O əlavə edib ki, vurulan dronların qalıqları həmçinin fərdi evə və qaz boru kəmərinə də ziyan vurub.
“Ozon” şirkəti hücuma məruz qalan logistika mərkəzinin fəaliyyətini müvəqqəti olaraq dayandıracağını açıqladı. "Obyektdə saxlanılan məhsullar vitrindən çıxarılacaq və sifarişlər dayandırılacaq. Eyni məhsullar digər logistika mərkəzlərində mövcud deyilsə, məhsullar "Stokda yoxdur" kimi qeyd olunacaq. Bəzi sifarişlər ləğv ediləcək, digərləri isə digər yerlərdən çatdırılacaq", - bazarın mətbuat xidməti qeyd edib. Anbar həmçinin satıcılardan yeni göndərişləri qəbul etməyəcək, tranzitdə olanlar isə başqa yerlərə yönləndiriləcək.
“Ozon” şirkətinin Adıgeyskdəki logistika kompleksi şirkətin Rusiyanın cənubundakı ən böyük logistika komplekslərindən biridir və 92 min kvadratmetr sahəni əhatə edir. Obyekt 10 milyondan çox əşyanın saxlanması üçün nəzərdə tutulub. Daha əvvəl 24 avqustda hücuma məruz qalmışdı və o zaman da yanğın baş vermişdi.
Ukrayna Silahlı Qüvvələri Rusiyanın onlayn pərakəndə satış şirkəti “Ozon” anbarlarını hədəf almağa 2026-cı ilin avqust ayında başlayıb. Şirkət əvvəllər cəmi iki ay ərzində 11 logistika mərkəzinə zərbə endirildiyini bildirmişdi.
Oktyabrın sonlarında “Ozon”un anbarlarına edilən dron hücumlarından dəyən zərərin 30,1 milyard rubl (təxminən 368,53 milyon dollar) olduğunu təxmin etdiyi bildirilirdi. Bundan əlavə, Rusiyanın ən böyük onlayn bazarlarına milyardlarla rubl zərər vuran irimiqyaslı hücumlar fonunda Rusiya sığortaçıları sığorta haqlarını kəskin şəkildə artırıblar.
Tahir TAĞIYEV
