Bakı.Trend:
Səudiyyə Ərəbistanı və Birləşmiş Ərəb Əmirlikləri (BƏƏ) Yaponiyanın dəstəyi ilə Cənub-Şərqi Asiya ölkələrinə fövqəladə hallar üçün neft ehtiyatları yaratmaqda kömək etməyə hazır olduqlarını bildiriblər.
Kyodo informasiya agentliyinin məlumatına görə, bu barədə Manilada keçirilən Sıfır Emissiyalı Asiya İcmasının (AZEC) nazirlərinin görüşünün iştirakçıları birgə bəyanatla çıxış ediblər.
Görüşdə Yaponiya, Cənub-Şərqi Asiya Dövlətləri Assosiasiyasına (ASEAN) üzv ölkələrin, Səudiyyə Ərəbistanının və BƏƏ-nin nümayəndələri iştirak ediblər. Birgə bəyanatda bazarda kəskin vəziyyət yarandığı təqdirdə enerji resurslarının sabit tədarükünü təmin edəcək regional neft ehtiyatlarının yaradılmasının vacibliyi vurğulanıb.
Bəyanatda qeyd olunub ki, Fars körfəzi regionunda yaranan böhran ASEAN ölkələrinin ciddi həssaslığını üzə çıxarıb. Region daxilində neft ehtiyatlarının son dərəcə az olması səbəbindən ölkələr kəskin neft çatışmazlığı təhlükəsi ilə üzləşiblər.
Bu ehtiyatların yaradılmasında onlara geniş təcrübəyə malik Yaponiya kömək etməyə hazırdır. Böhran başlayanda Yaponiyanın neft ehtiyatları ölkənin 254 günlük tələbatını ödəməyə kifayət edirdi. Bu ehtiyatlar dövlətə və özəl şirkətlərə məxsus olmaqla, ümumilikdə təxminən 470 milyon barel təşkil edir.
Yaponiya ərazisində Səudiyyə Ərəbistanı və digər neft ixracatçısı ölkələrin dövlət şirkətlərinə neft saxlamaq üçün icarəyə verilən rezervuarlar da yerləşir. Fövqəladə hallarda Yaponiya həmin ehtiyatlardan xammal almaqda üstünlük hüququna malikdir.
