Bakı. Trend:
İranın cənubunda yerləşən Əsəluyədə yanacaq anbarlarına və enerji obyektlərinə endirilən zərbələr nəticəsində atmosferə təxminən 4,7 min ton üzvi birləşmə atılıb.
Bu barədə İran vitse-prezidenti, Ətraf Mühitin Mühafizəsi Təşkilatının rəhbəri Şina Ənsari bildirib.
“Bu hücumların cəmi bir neçə günü ərzində atmosferə təxminən 4,7 min ton uçucu üzvi birləşmə atılıb”, – deyə Tasnim agentliyi onun açıqlamasından sitat gətirib.
Ənsarinin sözlərinə görə, enerji infrastrukturuna endirilən zərbələr nəticəsində atmosferə daxil olan çirkləndirici maddələrin həcmi o qədər böyük olub ki, Tehranda şəhərin təxliyəsini zəruri edə biləcək vəziyyət yarana bilərdi.
Lakin vitse-prezidentin izahına görə, atmosferin sərhəd qatının yüksək olması səbəbindən çirkləndirici maddələrin əsas hissəsi İran paytaxtında yer səthinə yaxın hava qatına çatmayıb.
O əlavə edib ki, hücumlar nəticəsində atmosferə 1,5 milyon ton karbon qazına ekvivalent həcmdə istixana qazları da buraxılıb.
