BAKI, 27 oktyabr. TELEQRAF
İordaniya Hərbi Hava Qüvvələrinin Suriyanın cənub bölgələrinə endirdiyi zərbələr nəticəsində azı 5 mülki şəxs həyatını itirib.
Teleqraf xəbər verir ki, bu barədə Suriyanın Dəra vilayəti administrasiyasının mətbuat xidməti “X” sosial şəbəkəsində məlumat yayıb.
Bildirilib ki, ölənlər arasında qadınlar, uşaqlar və 65 yaşlı kişi də var. Onların hamısının hava zərbələrinə məruz qalan Tariq əs-Sədd rayonundan gətirildiyi qeyd olunub.
Vilayətin qərbində yerləşən Mzayrib yaşayış məntəqəsində də ölən və yaralananların olduğu bildirilir. Zərərçəkənlərin dəqiq sayı müəyyənləşdirilir.
Məlumata görə, oktyabrın 26-da İordaniya hərbi təyyarələri Suriyanın cənubunda ekstremist qruplaşmaların obyektlərinə zərbələr endirib. Əməliyyat həmin qruplaşmaların İordaniyanın Əl-Kərək vilayətində Müqəddəs Georgi kilsəsinə hücum edən terrorçularla əlaqəsinin müəyyənləşdirilməsindən sonra həyata keçirilib.
İordaniya Səhiyyə Nazirliyinin məlumatına əsasən, oktyabrın 23-də anım mərasimi zamanı törədilən terror aktında 9 nəfər ölüb, 34 nəfər yaralanıb.
