Braziliyanın “Sao Paulo” klubunun sabiq hücumçusu Tyerri Henri Santos Souza zədələrinin müalicəsində yol verilən səhvlərə görə keçmiş komandasını məhkəməyə verib. 19 yaşlı futbolçu təxminən 700 min funt sterlinq (5 milyon real) təzminat tələb edir.
Publika.az xəbər verir ki, bu barədə “ESPN Brasil” məlumat yayıb.
13 yaşında “Sao Paulo”nun akademiyasına qoşulan Henri 2023-cü ildə, 16 yaşında ilk peşəkar müqaviləsini imzalayıb. O, klubda çıxış etdiyi müddətdə diz, bud, topuq, əl və qasıq nahiyələrindən olmaqla beş ayrı zədə aldığını bildirib. Futbolçu mart ayında komandadan ayrılmaq üçün icazə istəyib.
Henrinin vəkilləri klubun tibbi heyətini səhlənkarlıqda ittiham edirlər. Onların iddiasına görə, yanvarda aparılan müayinələr zamanı futbolçuda qasıq sümüyünün iltihabı və sağrı nahiyəsində ödem aşkarlansa da, o, bərpa prosesini tamamlamadan məşqlərə buraxılıb. Bundan başqa, ötən il müayinədə sağ budun dördbaşlı əzələsində 34 faizlik güc fərqi müəyyən edildikdən cəmi səkkiz gün sonra futbolçunun oynamağa icazə aldığı iddia olunur.
Futbolçunun nümayəndələri bildiriblər ki, mübahisə zədələrin mövcudluğundan deyil, klubun onların diaqnozu və müalicəsi ilə necə məşğul olmasından qaynaqlanır. Onların fikrincə, tibbi səhvlər gənc hücumçunun karyerasına mənfi təsir göstərib.
Vəkillər Henrinin 2023-cü ildə imzaladığı müqavilədə 60 milyon avroluq sərbəstqalma məbləğinin nəzərdə tutulduğunu da xatırladıblar. Onların sözlərinə görə, bu, klubun futbolçunun gələcəyinə böyük ümidlər bəslədiyini göstərir.
Təqdim olunan iddia itirilmiş gəlirləri, ödənilməmiş məzuniyyət haqlarını, mənəvi zərəri, müqavilə üzrə cərimələri, eləcə də keçmiş və gələcək tibbi xərcləri əhatə edir. Tələbin əsas məbləği 4,24 milyon realdır. Vəkil haqqı da əlavə edildikdə ümumi məbləğ 5 milyon reala yaxınlaşır.
Bununla belə, klubun akademiyasındakı bəzi mənbələr futbolçunun müqaviləsini yenilədikdən sonra məşqlərdə kifayət qədər səy və intizam göstərmədiyini, nəticədə məşqçilərin ona daha az şans verdiyini iddia edirlər.
“Sao Paulo”ya məhkəmə sənədləri hələ rəsmi şəkildə təqdim edilməyib. Klubun nümayəndələri sənədlərlə tanış olduqdan sonra məsələyə münasibət bildirməyi planlaşdırırlar.
