Rusiyada Xabarovsk şəhərinin sakini bankdan təxminən 20 milyon rubl mənimsəməkdə şübhəli bilinir.
News24.az xəbər verir ki, bu barədə Rusiya Daxili İşlər Nazirliyinin regional idarəsindən məlumat verilib.
İstintaqın məlumatına görə, fərdi sahibkar kimi qeydiyyatdan keçmiş 37 yaşlı kişi 2024-cü ilin fevralında kredit almaq üçün banka iki müraciət təqdim edib.
O, sənədləri rəsmiləşdirərkən yanlış məlumatlar göstərib, borc öhdəliklərini gizlədib və aylıq gəlirinin 2 milyon rubldan çox olduğunu bildirib.
Nəticədə bank kredit müraciətlərini təsdiqləyib və kişi ümumilikdə 19 milyon 600 min rubl (414 min AZN) əldə edib.
İstintaq hesab edir ki, kişi götürdüyü milyonlarla rublu banka qaytarmaq niyyətində deyil.
O, kredit vəsaitlərini şəxsi məqsədləri üçün xərcləyib. Daha sonra fərdi sahibkar kimi fəaliyyətinə xitam verilib. O, daha sonra kommersiya şirkətində menecer kimi işə düzəlib və müflis olması haqda prosedura başlayıb.
