Milli ilə vidalaşan Messidən ilk açıqlama

Səkkizqat "Qızıl top" sahibi Lionel Messi Argentina milli komandasında keçirdiyi illərə rəsmən son qoyub.

Milli.Az xəbər verir ki, əfsanəvi futbolçu qərarı ilə bağlı sosial şəbəkə hesablarında duyğusal paylaşım edib. Messi milli komandanın formasını geyinməyin onun üçün xüsusi məna daşıdığını vurğulayaraq bu qərarın doğru olduğuna inandığını bildirib.

Vida mesajında futbolçu belə yazıb:

"Dünən mənim son oyunum idi və mən artıq darıxıram. Bilirəm ki, doğru qərar verirəm. Bu, sevinclərlə, həm də bəzi kədərlərlə dolu inanılmaz bir yol idi, lakin dəqiq bilirəm ki, atılan hər bir addıma dəyərdi. Milli komandanın formasını geyinmək vaxtı çatanda hisslərimə həmişə hörmətlə yanaşdıqları və özümü ölkəmə həsr etməyə imkan verdikləri üçün oynadığım bütün klublara təşəkkür edirəm".

Lionel Messi Argentina yığmasının heyətində son matçını oktyabrın 7-nə keçən gecə Beninə qarşı keçirib. Qarşılaşma Argentina­nın 3:0 hesablı qələbəsi ilə yekunlaşıb. Nikolas Otamendi və Niko Pasın da fərqləndiyi görüşdə Messi 71-ci dəqiqədə penaltidən topu rəqib qapısından keçirib. O, həmçinin iki məhsuldar ötürmə ilə yadda qalıb.

Qeyd edək ki, Messi avqustun 31-də Argentina millisindəki karyerasını yekunlaşdırmaq qərarını açıqlamışdı.

Karyerası ərzində "Barselona" və PSJ-də çıxış edən futbolçu hazırda "İnter Mayami"nin formasını geyinir. Messi klub səviyyəsində 4 dəfə Çempionlar Liqasının, 3 dəfə UEFA Superkubokunun və Klublararası Dünya Çempionatının qalibi olub.

Bundan əvvəl Kriştianu Ronaldo da Lionel Messinin milli komandadan ayrılması ilə bağlı ona dəstəyini ifadə edən paylaşım etmişdi.

Müəllif: Tural Hüseyn (Milli.Az redaktor)