“Liverpul”un baş məşqçisi Andoni İraola komandanın zədəli futbolçuları Dominik Soboslai, Aleksander İsak və Kodi Qakponun vəziyyəti barədə danışıb.
İdman.Biz xəbər verir ki, ispaniyalı mütəxəssis UEFA Çempionlar Liqasının Liqa mərhələsində Avstriyanın LASK klubu ilə keçiriləcək qarşılaşmadan əvvəl hər üç futbolçunun meydana qayıdacağı tarixin hələ məlum olmadığını bildirib.
Soboslai İngiltərə Premyer Liqasında “Mançester Siti”yə qarşı keçirilən və “Liverpul”un 0:3 hesabı ilə məğlub olduğu matçı buraxıb. Macarıstanlı yarımmüdafiəçi komanda ilə birlikdə Avstriyaya da yollanmayıb. İsak və Qakpo da zədə səbəbindən LASK-la görüşdə iştirak etməyəcəklər.
“Onların vəziyyəti pis deyil, amma hazırda nə vaxt qayıdacaqlarını söyləmək çətindir. Vəziyyətlərini hər gün qiymətləndiririk. Açığı, üçünün də “Brentford”, yoxsa “Vilyarreal”la oyuna hazır olacağını bilmirəm”, - deyə İraola bildirib.
“Liverpul”un digər futbolçusu Miloş Kerkez də həmyerlisi Soboslainin vəziyyətinə münasibət bildirib:
“Onun şənbə günü oynamağa hazır olub-olmayacağını bilmirəm. Bunu baş məşqçidən soruşmalısınız. Dominiki yaxşı tanıyıram, o, uzun müddət meydandan kənarda qalmağı sevmir. Hər oyunda iştirak etmək istəyir və əminəm ki, şənbə günü də oynamağa can atacaq”.
Qeyd edək ki, “Liverpul” Çempionlar Liqasının Liqa mərhələsində ilk oyununda “Atletiko”nu məğlub edib. Mersisayd təmsilçisi oktyabrın 14-də Linzdəki “Rayffayzen Arena”da LASK-ın qonağı olacaq.
