İngiltərə Premyer Liqasının 9-cu turunun son oyununda “Everton” səfərdə “Nyukasl”ı 1:0 hesabı ilə məğlub edib.
İdman.Biz xəbər verir ki, qarşılaşmanın taleyini ikinci hissənin əvvəlində vurulan yeganə qol həll edib.
49-cu dəqiqədə “Everton”un hücumçusu Tierno Barri fərqlənib. Tayrik Corcun zərbəsindən sonra “Nyukasl”ın qapıçısı Lukaş Horniçek topu tuta bilməyib. Yaranmış vəziyyətdən istifadə edən fransalı hücumçu yaxın məsafədən topu qapıya göndərib.
Buraxılan qoldan sonra meydan sahibləri hesabı bərabərləşdirməyə çalışıblar. “Nyukasl”ın futbolçusu Entoni Elanqanın zərbəsindən sonra top dirəyə dəyib. Əlavə vaxtda isə Yoan Vissanın zərbəsini qapıçı Cordan Pikford ayağı ilə dəf edib.
Qarşılaşmanın sonlarında meydan sahibləri azlıqda qalıblar. Ceykob Remsi 90+8-ci dəqiqədə qırmızı vərəqə alaraq meydandan kənarlaşdırılıb.
Beləliklə, “Everton” dörd gün ərzində “Nyukasl” üzərində ikinci qələbəsini qazanıb. Liverpul təmsilçisi oktyabrın 29-da İngiltərə Liqa Kubokunun dördüncü mərhələsində də eyni rəqibi 3:1 hesabı ilə məğlub etmişdi. Həmin qarşılaşmada da Tierno Barri qol vurmuşdu.
Bu qələbədən sonra “Everton” 13 xalla turnir cədvəlinin yeddinci pilləsinə yüksəlib. “Nyukasl” isə 11 xalla 13-cü yerdə qərarlaşıb.
Növbəti turda “Everton” noyabrın 6-da “Koventri Siti”ni qəbul edəcək. “Nyukasl” isə noyabrın 7-də “Fulhem”lə qarşılaşacaq.
