“NATO mümkün ölümcül hibrid hücuma qarşı qətiyyətli cavab hazırlamalıdır”.
Globalinfo.az xəbər verir ki, bunu Polşa xarici işlər naziri Radoslav Sikorski deyib.
Nazirin sözlərinə görə, Rusiyanın iddia edilən “hibrid əməliyyatları” səbəbindən insanların həlak olması ehtimalı artır.
“Əsas məsələ nəyin hücum, nəyin sərhədlərarası hücum hesab edilməsidir. Söhbət hələlik maddi zərərdən gedirsə, bu, başqa məsələdir. Ancaq insanlar həlak olmağa başlasa, NATO çərçivəsində daha bir çox ciddi müzakirə aparmalı olacağıq”, – deyə Sikorski bildirib.
O, ölüm hallarının baş verəcəyi təqdirdə NATO-nun necə cavab verməli olduğunu açıqlamaqdan imtina edib.
Bununla belə, Polşa və Estoniyanın alyansın Nizamnaməsinin məsləhətləşmələrin keçirilməsini nəzərdə tutan 4-cü maddəsinə müraciət etdiyini vurğulayıb.
Qeyd edək ki, bundan əvvəl beş Avropa ölkəsinin kəşfiyyat orqanları Kremlin Ukraynaya dəstəyi zəiflətmək üçün təxribat və hibrid əməliyyatları genişləndirdiyi barədə xəbərdarlıq edib.
Məlumata görə, iri müdafiə şirkətlərinin rəhbərləri, eləcə də dron və komponentlər istehsal edən kiçik firmaların işçiləri risk altındadır: “Bəzi yüksək vəzifəli rəhbərlər üçün təhlükəsizlik tədbirləri artıq gücləndirilib. Almaniyada kəşfiyyat xidmətləri müdafiə şirkətlərinə özəl təhlükəsizlik detallarından istifadə etməyi məsləhət görür.
Avropa kəşfiyyat agentlikləri hesab edir ki, bu əməliyyatların əsas məqsədi təkcə fərdlərin fiziki olaraq aradan qaldırılması deyil, həm də qorxutmaqdır – biznesləri Ukrayna ilə işləməzdən əvvəl iki dəfə düşünməyə məcbur etməkdir”.
Günay Rəsulqızı
Globalinfo.az
