Albaniya Superliqasında X turun oyunları keçirilir.
Futbolpress.az xəbər verir ki, azərbaycanlı müdafiəçi Zamiq Əliyevin formasını geyindiyi “Eqnatiya” səfərdə “Tirana”nın qonağı olub. Gərgin mübarizə şəraitində keçən matçda qonaqlar iradə nümayiş etdirərək 2:1 hesabı ilə qalib gəliblər.
Meydan sahibləri erkən qolla önə keçiblər. Artıq 4-cü dəqiqədə Drilon Xazrollay hesabı açıb. Lakin “Eqnatiya” tez bir zamanda tarazlığı bərpa edib. 20-ci dəqiqədə Karim Lukili Edison Ndretsanın ötürməsindən sonra fərqlənib (1:1). İkinci hissədə isə əvəzetmədən oyuna daxil olan İbrahim Diabatenin qolu komandasına qələbə qazandırıb.
Qeydə alınan nəticə:
Albaniya Superliqası
X tur
Tirana – Eqnatiya 1:2
Qollar: Drilon Xazrollay, 4 – Karim Lukili, 20, İbrahim Diabate, 77
Zamiq Əliyev qarşılaşmaya start heyətində çıxıb və 90 dəqiqə ərzində inamlı müdafiə xətti nümayiş etdirərək komandasının qələbəsində pay sahibi olub.
Bu qələbədən sonra ardıcıl ikinci uğurunu qazanan “Eqnatiya” xalını 24-ə çatdırıb və turnir cədvəlində birinci pillədəki mövqeyini qoruyaraq ən yaxın izləyicisi “Teuta” ilə fərqi 4 xala yüksəldib.
