ABŞ Dövlət Departamenti Səudiyyə Ərəbistanında çalışan, fövqəladə vəzifələri yerinə yetirməyən hökumət əməkdaşlarına və onların ailə üzvlərinə ölkəni tərk etmək göstərişi verib.
Editor.az xəbər verir ki, ABŞ Dövlət Departamentinin sözçüsü Tommi Piqqott Körfəz ölkələrindəki Amerika diplomatik nümayəndəliklərinin əməkdaşlarının və onların ailə üzvlərinin kütləvi şəkildə təxliyə ediləcəyi ilə bağlı yayılan məlumatları təkzib edib. Onun sözlərinə görə, ölkəni tərk etmək barədə məcburi göstəriş yalnız Səudiyyə Ərəbistanındakı ABŞ hökumətinin əməkdaşlarına və onların ailə üzvlərinə şamil olunur.
Qərarın Yəməndə fəaliyyət göstərən və İran tərəfindən dəstəklənən husilərin Səudiyyə Ərəbistanına qarşı hücumlarının intensivləşməsi fonunda qəbul edildiyi bildirilir. Piqqottun sözlərinə görə, mülki hava limanlarına və digər mühüm infrastruktura edilən hücumlar insan tələfatına, eləcə də nəqliyyat əlaqələrində ciddi fasilələrə səbəb olub.
Dövlət Departamentinin nümayəndəsi ABŞ diplomatik heyətinin və onların ailələrinin təhlükəsizliyinin prioritet olaraq qaldığını vurğulayıb. O, əməkdaşların qorunması və onlara dəstək göstərilməsi üçün zəruri tədbirlərin davam etdiriləcəyini qeyd edib.
ABŞ Prezidenti Donald Tramp isə jurnalistlərin məsələ ilə bağlı sualını cavablandırarkən belə bir qərardan xəbərdar olmadığını bildirib.
Bununla yanaşı, bəzi media orqanlarında Birləşmiş Ərəb Əmirlikləri, İordaniya, Qətər və Bəhreyndəki ABŞ diplomatik nümayəndəliklərinin əməkdaşlarının ailə üzvlərinin də ölkələrdən çıxarılmasının istənildiyi barədə məlumatlar yayılıb. Lakin ABŞ Dövlət Departamenti bu məlumatları təsdiqləməyib.
Beləliklə, Vaşinqtonun açıqladığı qərar Səudiyyə Ərəbistanındakı müəyyən kateqoriyadan olan ABŞ hökuməti əməkdaşlarının və onların ailə üzvlərinin ölkəni tərk etməsini nəzərdə tutur. Digər Körfəz ölkələri ilə bağlı yayılan məlumatlar isə rəsmi təsdiqini tapmayıb.
//Gülnarə Abasova, Editor.az
