Bakı, 30 oktyabr,
“Meyvələr” kolleksiyasında nümayiş olunan əsərlərin yaradılmasında əsas ilham mənbəyim uşaqlıq xatirələrimdir. Nənəm xalçaçı olub. Onun toxuduğu xalçalar və danışdığı hekayələr məni həmişə ruhlandırıb.
Bunu AZƏRTAC-a açıqlamasında rəssam Samirə Allahverdiyeva deyib.
Rəssamın sözlərinə görə, nənəsi uşaqlıqda ona kənd həyatından, meyvələrin xalça üzərində qurudulmasından danışarmış. Nənəsi narın, heyvanın və digər meyvələrin əvvəlcə qurudulub evə gətirildiyini söyləyərmiş. Bu söhbətlər rəssamda meyvələrin xalça üzərindəki görüntüsünə böyük maraq oyadıb.
“Bu mövzu mənim üçün çox doğmadır və zamanla işlərimdə də əksini tapıb. Bir gün fərqinə vardım ki, uşaqlıq xatirələrimi özüm də əsərlərimdə təsvir edirəm. İstəyirəm ki, işlərimə, xalçalarıma baxanlar milli mədəniyyətimizi hiss etsin, hər kəs öz evindən, uşaqlığından, torpağından nələrsə xatırlasın”, – deyə rəssam əlavə edib.
Müxbir - Günel Alıyeva
