İranın xarici işlər naziri Abbas Əraqçi çərşənbə axşamı bildirib ki, Rusiya və İran heç vaxt indiki qədər sıx əməkdaşlıq etməyib. Bu, Moskvanın Yaxın Şərqdəki müharibədə vasitəçi rolunu oynamağa çalışdığı bir vaxta təsadüf edir.
Xezerxeber.az xarici mediaya istinadla xəbər verir ki, Abbas Əraqçi bazar ertəsi İranda rusiyalı həmkarı Sergey Lavrovla görüşüb.
Bu, münaqişə başlayandan bəri baş tutan ilk səfər olub.
İranlı nazir “X” sosial şəbəkəsində yazıb: “Biz Avropadan Qərbi Asiyaya qədər, o cümlədən Livan, Fələstin, Ukrayna və Yəmənlə bağlı bütün məsələləri müzakirə etdik. Həmçinin iqtisadi və nüvə sahəsində əməkdaşlığın genişləndirilməsinə diqqət yetirdik. Tariximizdə İran və Rusiya heç vaxt indiki qədər sıx əməkdaşlıq etməyib”.
Lavrov səfərdən əvvəl bildirib ki, ABŞ ilə İran arasında danışıqların dalana dirəndiyi bir vaxtda Moskvanın səyləri müharibənin yenidən alovlanmasının qarşısını almağa yönəlib.
Bu səfər Rusiya Prezidenti Vladimir Putinin bu ay iranlı həmkarı Məsud Pezeşkiana Moskvanın vasitəçilik səylərinə töhfə verməyə hazır olduğunu bildirməsindən sonra baş tutub.
Görüşdə qeyd olunub ki, dünyada ən ağır sanksiyalara məruz qalan iki ölkə – Rusiya və İran bir-biri ilə sıx əlaqələr saxlayır. Rusiya Xarici İşlər Nazirliyi Lavrovun İrana səfərindən əvvəl bildirib ki, müzakirələrin əsas mövzusu ABŞ-nin İrana qarşı qanunsuz təcavüzü nəticəsində yaranmış kəskin beynəlxalq böhranın həlli yolları olacaq.
Nazirlik qeyd edib ki, bu müharibə təkcə Yaxın və Orta Şərqdə deyil, həm də qlobal miqyasda sabitliyə və təhlükəsizliyə ciddi zərbə vurub.
