Bakı. Trend:
Fransa Hərbi Dəniz Qüvvələri bazar ertəsi Reyunyon adasının cənubunda saxta bayraq altında üzdüyü ehtimal edilən və yanacaq daşınması ilə bağlı qanunsuz fəaliyyətlərdə iştirak etdiyi güman olunan gəmini saxlayıb. Bu barədə Fransa Prezidenti Emmanuel Makron məlumat verib.
“Bu səhər Reyunyon adasından 450 dəniz milindən çox cənubda Fransa Hərbi Dəniz Qüvvələri DF Peak neft tankerini saxlayıb”, – deyə dövlət başçısı X sosial şəbəkəsində bildirib. O, müdaxilənin qısa görüntülərini də paylaşıb və Qərbin embarqolarından yayınmaq üçün Rusiyanın istifadə etdiyi gəmiləri ifadə edən “kölgə donanması” ilə mübarizədə Fransanın qətiyyətli olduğunu vurğulayıb.
Benin bayrağı altında üzən DF Peak neft tankeri Aİ-nin sanksiya tətbiq edilmiş gəmilər siyahısına daxildir. Gəminin 25 iyun 2024-cü ildən, o zaman Kaliningrad adlandığı dövrdən etibarən Rusiyanın kölgə donanmasına aid olduğu ehtimal edilir.
Fransa Silahlı Qüvvələrinin Baş Qərargahı da X sosial şəbəkəsində açıqlama yayaraq bildirib ki, gəmidə yoxlama aparan qrupun göyərtəyə qalxmasından sonra sənədlərin araşdırılması gəminin daşıdığı bayrağın qanuniliyinə dair şübhələri təsdiqləyib. Qurum gəminin Fransa Hərbi Dəniz Qüvvələrinin müşayiəti altında müəyyən edilmiş marşrutdan kənara yönəldildiyini də qeyd edib.
Hazırda Avropa İttifaqının sanksiya siyahısında 700-dən çox gəmi var. ABŞ, Böyük Britaniya və ya Avropa İttifaqının sanksiyalarına baxmayaraq, Rusiyanın karbohidrogen ixracında istifadə olunduğu ehtimal edilən gəmilər yoxlamalardan yayınmaq üçün bəzən adlarını və ya bayraqlarını dəyişirlər.
Fransa prezidentinin bu açıqlaması Avropada Ukraynada müharibənin gələcəyi ilə bağlı narahatlığın artdığı bir vaxtda, sanksiyaların bir hissəsinin ləğv edilməsi və Vaşinqtonla Moskva arasında Rusiya dizel yanacağının tədarükünə dair razılaşmanın əldə olunması fonunda verilib.
ABŞ Prezidenti Donald Tramp cümə günü Rusiya dizel yanacağının böyük həcmdə ABŞ və dünya bazarlarına tədarükü ilə bağlı razılaşma əldə etdiyini açıqlayıb. Bu məqsədlə o, Moskvaya qarşı tətbiq olunan sanksiyaları ləğv edib. Ukrayna Prezidenti Volodimir Zelenski isə bu qərarı “ləyaqətsiz” adlandıraraq sərt tənqid edib.
Öz növbəsində, Avropa İttifaqı Moskvaya qarşı tətbiq etdiyi tədbirləri gücləndirməyə davam edəcəyini vəd edib. Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas şənbə günü bildirib ki, Rusiya dizel yanacağına qarşı sanksiyaların ləğvi Kremlin qonşu Ukraynaya qarşı apardığı müharibənin davam etməsinə şərait yaradır.
Donald Tramp bazar günü Rusiya ilə Ukrayna arasında “enerji atəşkəsi”nin əldə olunduğunu da açıqlayıb.
Volodimir Zelenskinin sözlərinə görə isə atəşkəsə əməl olunmur. O, bazar ertəsi X sosial şəbəkəsində yazıb:
“ABŞ-ın təklif etdiyi enerji atəşkəsini Rusiyanın qəbul etməkdən imtina etdiyi və əhalimizə qarşı terror xarakterli hava hücumlarını davam etdirmək niyyətində olduğu getdikcə daha aydın görünür”.
Ukrayna liderinin sözlərinə görə, Rusiya bazar ertəsi Ukraynada altı enerji infrastrukturuna zərbə endirib.
