Bakı. Trend:
İsveç çempionatında (Allsvenskan) "AİK" və "Brommapoykarna" komandaları çempionat tarixinin ən inanılmaz oyunlarından birinə imza atıblar. İlk hissə qolsuz başa çatdıqdan sonra komandalar ikinci hissədə 11 qol vurublar. Oyunun gedişində "Brommapoykarna" 5:1 hesablı üstünlüyünü əldən verib, "AİK" 98-ci dəqiqədə hesabı 5:5-ə çatdırıb, lakin "Brommapoykarna" yenə də həlledici qol vuraraq 6:5 hesabı ilə qalib gəlib.
Oktyabrın 10-da, şənbə günü, "Strawberry Arena"da keçirilən "AİK"–"Brommapoykarna" matçı 5:6 hesabı ilə başa çatıb. Bu, "Brommapoykarna"nın Allsvenskanda "AİK" üzərində qazandığı ilk qələbədir. Eyni zamanda, bir hissədə vurulan qolların sayına görə İsveç çempionatının əvvəlki rekordu yenilənib.
Bir neçə dəfə taleyi həll olunmuş kimi görünən oyunda mübarizə son saniyələrədək davam edib.
48-ci dəqiqədə Simon Strand "Brommapoykarna"nı hesabda önə keçirib. "AİK" 55-ci dəqiqədə Abdihakim Əlinin qolu ilə hesabı bərabərləşdirib. Lakin bundan sonra qonaqlar meydan sahiblərini "qol yağışına" tutub.
Kamilcan Sever 59-cu dəqiqədə hesabı 1:2 edib. İki dəqiqə sonra Vilmer Odefalk fərqi iki topa çatdırıb – 1:3. Sever isə 65-ci dəqiqədə yenidən fərqlənib.
70-ci dəqiqədə Severin ötürməsindən sonra Anton Kuroçkin hesabı 1:5-ə çatdırdıqda matçın taleyinin həll olunduğu düşünülüb. Belə ki, "Brommapoykarna" rəqib hücumlarını dayandırmaq yolunu tapa bilməyən "AİK"ın qapısına 22 dəqiqə ərzində beş qol vurub.
Lakin bundan sonra oyunun gedişi əks məcrada cərəyan edib.
73-cü dəqiqədə Lukas Berqkvistin ötürməsindən sonra Taha Ayari fərqi azaldaraq hesabı 2:5 edib. Növbəti dəqiqədə "AİK"nin heyətində Siksten Qustafson meydana daxil olub. Əvəzetmə "AİK" üçün uğurlu olub. Qustafson 81-ci dəqiqədə hesabı 3:5-ə çatdırıb, cəmi üç dəqiqə sonra isə eyni futbolçu daha bir qol vuraraq fərqi minimuma endirib – 4:5. Beləliklə, cəmi 11 dəqiqə ərzində "AİK" dörd top fərqi ilə geridə olduğu vəziyyətdən hesabı 4:5-ə çatdırıb.
Matçın hakimi əsas vaxta 8 dəqiqə əlavə edib və 98-ci dəqiqədə "AİK" hesabı bərabərləşdirib, Yohan Hove fərqlənib. Lakin dramatik mübarizə bununla başa çatmayıb. "Brommapoykarna" əlavə olunmuş vaxtda daha bir qol vurmağı bacarıb. Beləliklə, qarşılaşma 5:6 hesabı ilə başa çatıb və "AİK"in inanılmaz geridönüşü komandaya heç bir xal da qazandırmayıb.
Qarşılaşma statistik baxımdan da tarixi əhəmiyyət daşıyır.
İsveç Futbol İttifaqının rəsmi rekordlar siyahısına əsasən, Allsvenskanda bir hissədə vurulan qolların əvvəlki rekordu 10 olub.
Bu göstərici 1945-ci il oktyabrın 14-də, "İFK Norçöpinq"in "Dürqorden"i 11:1 hesabı ilə məğlub etdiyi matçda qeydə alınıb.
"AİK" və "Brommapoykarna" isə fasilədən sonra 11 qol vurublar. Beləliklə, Allsvenskanın bir hissəsində vurulan qolların sayına görə yeni rekord müəyyənləşib.
Bununla belə, bu, Allsvenskan tarixində bir matçda vurulan ən çox qol rekordu deyil. Bir oyunda ən çox qol rekordu 14-ə bərabərdir və bu göstərici 1928 və 1936-cı illərdə iki dəfə qeydə alınıb.
"Brommapoykarna" üçün bu qələbə həm də uzun müddət davam edən uğursuz seriyanın başa çatması deməkdir. Şənbə gününə qədər klublar Allsvenskan çərçivəsində 19 dəfə qarşılaşmışdılar. Bu oyunların 15-də "AİK" qalib gəlmiş, dörd qarşılaşma isə heç-heçə ilə başa çatmışdı.
Qələbə nəticəsində "Brommapoykarna" xalını 30-a çatdırıb və 33 xalı olan "AİK" ilə arasındakı xal fərqini azaldıb. "Aİk" isə Allsvenskanda ardıcıl beşinci matçda qələbə qazana bilməyib.
"Brommapoykarna"nın növbəti oyunu oktyabrın 16-da "Dürqorden"ə qarşı olacaq. "AİK" isə oktyabrın 17-də "İFK Göteborq"la qarşılaşacaq.
