Bakı.Trend:
İspaniyanın Bilbao şəhərində ötən gecə baş vermiş iğtişaşlar zamanı hüquq-mühafizə orqanları azı 19 nəfəri saxlayıb.
Bu barədə RTVE teleradio şirkəti məlumat yayıb.
Məlumata görə, hadisələr qatı-sağçı fəal Vito Kilesin iştirakı ilə keçirilməsi planlaşdırılan tədbirə etiraz olaraq bir neçə min nəfərin yerli universitetlərdən birinin qarşısında mitinq keçirməsindən sonra baş verib. Tədbirin başlamasına təxminən yarım saat qalmış onun ləğv edildiyi elan olunub.
Bundan sonra bir neçə yüz radikal yaxınlıqdakı prospektə doğru hərəkət edib və burada iğtişaşlar başlayıb. İğtişaş iştirakçıları polis əməkdaşlarını və polis şöbəsinin binasını daş atəşinə tutub, zibil konteynerlərini və avtomobilləri oda verib, şəhər əmlakına ziyan vurublar.
Saxlanılanlar arasında yeddi nəfər yetkinlik yaşına çatmayan şəxs var.
