Bakı. Trend:
2026-cı il martın 21-dən sentyabrın 22-dək İranın Gilan vilayətində yerləşən Astara sərhəd-keçid məntəqəsi vasitəsilə ümumilikdə 395 milyon dollar dəyərində 643 min ton məhsulun ticarət dövriyyəsi qeydə alınıb.
Bunu Trend-ə açıqlamasında İranın Gilan vilayətinin valisi Hadi Haqşenas deyib.
“6 ayda Astara sərhəd-keçid məntəqəsi ilə 270 milyon dollar dəyərində məhsul ixrac edilib”, - deyə o qeyd edib.
Gilan valisi əlavə edib ki, sözügedən müddətdə Astara sərhəd-keçid məntəqəsi vasitəsi ilə ölkəyə 125 milyon dollar dəyərində məhsul idxal olunub.
Haqşenas bildirib ki, Astara sərhəd-keçid məntəqəsi ilə ümumilikdə 1,1 milyon ton yük daşınıb.
Haqşenas qeyd edib ki, 6 ayda Astara sərhəd-keçid məntəqəsi İranda ixrac baxımından 4-cü yeri, idxal baxımından 3-cü yeri və yük tranziti baxımından 5-ci yeri tutub.
Onun sözlərinə görə, sözügedən müddətdə Astara sərhəd-keçid məntəqəsi ilə 70 min minik avtomobili tranzit olunub.
Qeyd edək ki, İranın Astara sərhəd-keçid məntəqəsi Azərbaycanla sərhəddə yerləşir. Bu sərhəd keçid məntəqəsində həm avtomobil yolu, həm də dəmiryolu fəaliyyət göstərir. Sözügedən dəmiryolu Şimal-Cənub Beynəlxalq Nəqliyyat Dəhlizinin bir hissəsi hesab olunur. Lakin Rəşt-Astara dəmiryolu tikilmədiyinə görə, Astara şəhərindən yüklər Rəşt şəhəriə qədər yük maşınları ilə daşınır. İran Rəşt-Astara dəmiryolunu istifadəyə verməklə bu istiqamətdə dəmiryolu ilə yükdaşımaların artırılmasına maraq göstərir.
