Bakı. Trend:
Fransanın müxtəlif şəhərlərində keçirilən etiraz aksiyaları zamanı baş verən toqquşmalar və iğtişaşlar nəticəsində azı 60 aksiya iştirakçısı xəsarət alıb.
Bu barədə “Le Figaro” qəzeti təcili yardım xidmətlərinə istinadən məlumat yayıb.
Məlumata görə, xəsarət alan nümayişçilərdən dördünün vəziyyəti ağırdır. Onların hansı şəraitdə yaralandığı barədə ətraflı məlumat verilmir.
Eyni sənəddə hüquq-mühafizə orqanlarının 18 əməkdaşının da xəsarət aldığı bildirilir. Bununla belə, qəzet bu statistikanın yekun olub-olmadığını dəqiqləşdirməyib.
Marsel Polis Prefekturasının məlumatına görə, yalnız bu şəhərdə iğtişaşların yatırılması və talan hallarının qarşısının alınması zamanı 19 hüquq-mühafizə orqanı əməkdaşı xəsarət alıb.
Bununla yanaşı, Parisdə bir neçə jandarm əməkdaşı etiraz aksiyasının aqressiv iştirakçılarının tərkibində yandırıcı qarışıq olan pirotexniki vasitələr atması nəticəsində ciddi yanıq xəsarətləri alıb.
