İsrail parlamentinin (Knesset) 26-cı çağırış seçkilərində saat 12.00-a (Bakı vaxtı ilə saat 13:00-a) olan məlumata görə, seçici fəallığı 31,5 faiz təşkil edib.
Bu barədə İsrailin 12-ci televiziya kanalı məlumat yayıb.
Kanalın məlumatına görə, bu göstərici 1973-cü ildən bəri İsraildə keçirilən seçkilər üçün rekord göstərici hesab olunur. Seçici fəallığı 2022-ci ilin noyabrında keçirilən son parlament seçkilərində qeydə alınan göstəricini də üstələyib. Həmin vaxt yerli vaxtla saat 12:00-a qədər seçicilərin 28,4 faizi səs vermişdi.
***
İsraildə parlament (Knesset) seçkiləri keçirilir.
Bu barədə İsrailin Mərkəzi Seçki Komissiyasının rəsmi saytında məlumat verilib.
Seçkilərdə ölkə parlamenti olan Knessetin 120 deputatı müəyyənləşəcək. Səsvermə İsraildə 2023-cü il oktyabrın 7-də başlayan müharibədən sonra keçirilən ilk ümumxalq seçkisidir.
İsrailin Baş naziri Benyamin Netanyahu və İsrail Müdafiə Qüvvələrinin keçmiş Baş Qərargah rəisi Qadi Eyzenkot seçkilərin əsas siyasi fiqurları arasındadır. Seçkilərin nəticələri ölkədə yeni hökumətin formalaşdırılması prosesinə təsir edəcək.
İsraildə hökumətin formalaşdırılması üçün parlamentdə ən azı 61 deputatın dəstəyi tələb olunur. Heç bir siyasi blok bu sayda mandat əldə etmədiyi təqdirdə hökumətin qurulması ilə bağlı danışıqların aparılması zərurəti yarana bilər.
Rəsmi nəticələrin noyabrın 4-dək dərc edilməsi nəzərdə tutulur.
