BAKI, 1 noyabr. TELEQRAF
"Real Madrid"in müdafiəçisi Eder Militaonun evindən 350.000 avrodan çox pul oğurlanıb.
Teleqraf xəbər verir ki, oğurluq hadisəsi paytaxt klubunun "Barselona" ilə oyunu zamanı baş verib.
Polisin məlumatına görə, oyunçunun qohumları aşağı mərtəbədə televizorda matçı izləyərkən ən azı iki oğru evə üçüncü mərtəbədəki vanna otağının pəncərəsindən daxil olub. Oğrular Militaonun yataq otağından zinət əşyaları və saat oğurlayıblar. Evin siqnalizasiya sistemi işlək vəziyyətdə olub və təhlükəsizlik kameraları oğruları bir neçə saniyə çəkə bilib.
Futbolçunun özü evə qayıtdıqdan sonra oğurluğu aşkar edib və hazırda ən əhəmiyyətli əşyalarından bəzilərini geri almağa çalışır. Militao özəl detektiv işə götürüb. Müstəntiq oğurluğun zərərçəkmişə yaxın biri tərəfindən təşkil edildiyini ehtimal edir. Polis artıq araşdırma aparır.
28 yaşlı Militao 2019-cu ildən bəri "Real Madrid"də oynayır. O, həmçinin Braziliyanın "San Paulo" və Portuqaliyanın "Porto" komandalarında da oynayıb. O, üçqat İspaniya çempionu, ikiqat Çempionlar Liqasının qalibi, Kral Kubokunun qalibi, ikiqat İspaniya Super Kuboku və UEFA Super Kubokunun qalibidir. Braziliya millisində oynayarkən o, 2019-cu il Amerika Kubokunun qalibi olub.
