BAKI, 20 oktyabr. TELEQRAF
Nigeriyada Ebola qızdırmasına ilk yoluxma halı təsdiqlənib.
Teleqraf xəbər verir ki, bu barədə "The Cable" qəzeti ölkənin Səhiyyə Nazirliyinə istinadən məlumat yayıb.
Səlahiyyətlilər Ebola virusuna yoluxduğu təsdiqlənmiş bir xəstənin 44 nəfərlə əlaqəsi müəyyən ediblər. Yoluxan şəxs Uqandadan təyyarə ilə Nigeriyaya gələn bir qadındır. O, Nigeriyanın paytaxtı Abujadakı özəl klinikada tibbi yardım alır.
Hökumət milli səhiyyə sistemindəki bütün qurumları maksimum sayıqlıq göstərməyə çağırıb.
Ebola epidemiyası Konqo Demokratik Respublikasında (KDR) 2026-cı ilin may ayında başlayaraq ölkə tarixində ən böyük epidemiyaya çevrilib. Son məlumatlara görə, bütün KDR-də 9400-dən çox yoluxma halı qeydə alınıb, 4500-dən çox ölüm hadisəsi qeydə alınıb. Xəstəlik səkkiz əyalətə yayılıb. Keniyada isə doqquz yoluxma halı qeydə alınıb.
