BAKI, 11 oktyabr. TELEQRAF
ABŞ Prezidenti Donald Trampın administrasiyası Ukraynaya silah tədarükü proqramını və kəşfiyyat məlumatlarının ötürülməsini dayandırmaqla hədələyir.
Teleqraf xəbər verir ki, bu barədə “Financial Times” (FT) qəzeti adı açıqlanmayan avropalı rəsmilərə istinadən məlumat yayıb.
Qəzetin mənbələrinin sözlərinə görə, oktyabrın 10-11-də ABŞ rəsmiləri bu məsələ ilə bağlı Avropanın bir sıra paytaxtlarına və Kiyevə bir neçə telefon zəngi ediblər.
Məlumata görə, Vaşinqton Ukrayna ilə kəşfiyyat məlumatlarının mübadiləsini dayandırmaqla yanaşı, Avropa ölkələrinin vəsaiti hesabına ABŞ-dən Ukrayna üçün silah alınmasını nəzərdə tutan PURL proqramını da dayandıracağı ilə bağlı xəbərdarlıq edib.
Mənbələrdən biri nəşrə bildirib ki, ABŞ rəsmiləri bu məsələ ilə bağlı Kiyevə və Avropanın müxtəlif ölkələrinə zəng ediblər.
“Financial Times”ın məlumatına görə, Vaşinqtonun əlaqə saxladığı şəxslər arasında Ukrayna Prezidenti Volodimir Zelenskinin ofis rəhbərinin müavini Pavel Palisa da olub.
Qəzet qeyd edib ki, Ağ Ev belə telefon zənglərinin edildiyini təsdiqləməkdən və məsələ ilə bağlı şərh verməkdən imtina edib.
