Amazon 5 planşet təqdim etdi, 2-si süni intellektlə şəkilli hekayə yaradır

    “Amazon” yeni Android planşetləri ilə yanaşı, uşaqlar üçün “Amazon Kids Tablet” modellərini də çıxarıb. Planşetlərdə “Google Play Store” mağazasına tam giriş var, amma valideynlər tətbiq və məzmun seçimlərini məhdudlaşdıra bilirlər. Modellərin ekranı 8,7 və 11 düymdür. Hər ikisinin gövdəsi alüminiumdandır və daxilində 8 nüvəli prosessor işləyir.    8,7 düymlük “Amazon Kids Tablet 8” 229,99 dollardan (təxminən 390 manat) başlayır. Modeldə 64 GB daxili yaddaş var və bir dolumla 14 saata qədər video izləmək olur. 11 düymlük “Amazon Kids Tablet 11” 329,99 dollardan (təxminən 560 manat) satılacaq. Onun 2.5K ekranı və 8 GB operativ yaddaşı var. Planşet stilusla işləyir və 15 saata qədər video izləməyə çatır.    “Amazon” planşetlər üçün 2 fərqli qoruyucu örtük hazırlayıb. 3 yaşdan yuxarı uşaqlar üçün tutacaqlı, qalın və yumşaq örtük hazırlanıb. 6 yaşdan yuxarı uşaqlar üçünsə dayaqlı, nazik və sərt örtük var. Örtüklərdə “Paw Patrol”, “Barbie” və “SpongeBob” personajlarının təsvirlərindən istifadə olunub. “Dynamic Tab” bölməsi uşağın yaşına uyğun məzmun məsləhət görür.    Planşetlərə 1 illik “Amazon Kids+” abunəsi daxildir. Xidmət “Disney”, “Nickelodeon” və “Lego” kimi şirkətlərin reklamsız kitab, video, oyun, tətbiq və audiokitablarını bir yerdə toplayır. “Storybuilder” funksiyası uşağın səslə danışdığı təsvirlər əsasında süni intellektlə şəkilli hekayə və komikslər yaradır.    Əvvəlcədən quraşdırılan “Parent Dashboard” bölməsində ekran vaxtını məhdudlaşdırmaq, istifadəyə nəzarət etmək və təhsil hədəfləri qoymaq olur. Valideynlər əyləncə tətbiqlərindən əvvəl tədris proqramlarının açılmasını seçə bilirlər. Ayarları iOS və Android tətbiqlərindən uzaqdan dəyişmək olur. “Google Play Store” mağazasında hər yükləmə ayrıca təsdiqlənə bilər.    Əsas seriyaya “Alexa Tablet 8”, “Alexa Tablet 11” və “Alexa Tablet 12 Pro” daxildir. “Alexa Tablet 12 Pro 6,5 mm qalınlığa malikdir. Onun 12 düymlük ekranı 120 Hz yenilənmə tezliyi sayəsində görüntünü daha hamar göstərir. Modeldə 16 saata qədər video izləmək olur. Wi-Fi 6E bağlantısı və “Dolby Atmos” səsi də var. Qiymət 499,99 dollardan (təxminən 850 manat) başlayır. İşığı daha az əks etdirən “Nanomatte” versiya 549,99 dollardan (təxminən 930 manat) satılacaq. “Pro Pen” stilusu və “Pro Keyboard” klaviaturası ayrıca çıxarılacaq.    Yeni planşetlərdəki “Alexa+” köməkçisi ekranda görünən məlumatı nəzərə alaraq sualları cavablandıra və ağıllı ev cihazlarını idarə edə bilir. “Kindle” tətbiqi açılanda bildirişlər susdurulur və mavi işıq azalır. Bu rejimdə batareyanın işləmə müddəti 20 saata çata bilər. Bütün modellər 14 oktyabr 2026-cı ildə ABŞ, Kanada və Meksikada satışa çıxacaq. Avropada satış 19 oktyabrda başlayacaq. “Amazon Kids Tablet” modelləri 14 oktyabrdan Yaponiyada da satılacaq.