.jpg)
"Öd kisəsinin çıxarılması insanın normal həyatına maneə deyil. Lakin əməliyyatdan sonra qidalanma vərdişlərinə müəyyən qədər diqqət etmək həzm sisteminin yeni vəziyyətə uyğunlaşmasını asanlaşdıra bilər". Bu fikirləri SİA-ya açıqlamasında tibb üzrə fəlsəfə doktoru Abbas Bağırov bildirib.
Onun sözlərinə görə, öd kisəsi qaraciyərin hazırladığı ödü toplayan və xüsusilə yağlı qidaların həzmi zamanı bağırsağa buraxan orqandır: "Öd kisəsi çıxarıldıqdan sonra isə qaraciyər öd istehsalını davam etdirir, lakin öd birbaşa bağırsağa axır. Buna görə insanların böyük əksəriyyəti bir müddət sonra adi, balanslı qidalanmaya qayıda bilir.
Əməliyyatdan sonrakı ilk günlərdə böyük porsiyalar əvəzinə kiçik və daha tez-tez qəbul edilən qidalar daha rahat həzm oluna bilər. Xüsusilə çox yağlı və qızardılmış yeməkləri birdən-birə qəbul etmək köp, qarında narahatlıq və ishala səbəb ola bilər. Çünki böyük miqdarda yağın həzm edilməsi üçün bağırsaqda kifayət qədər ödün eyni anda olması çətinləşə bilər.
Öd kisəsi əməliyyatı keçirmiş insanın əsas qida rasionu sağlam və balanslı olmalıdır. Qaynadılmış, buğda hazırlanmış və ya sobada bişirilmiş yeməklər, yağsız və ya az yağlı balıq, dərisiz toyuq və hinduşka, yağsız ət, tərəvəzlər, meyvələr, yulaf və digər tam taxıllar, düyü, qarabaşaq və digər taxıl məhsulları, az yağlı süd məhsulları, kifayət qədər su.
Liflə zəngin qidalar – yulaf, arpa, tərəvəz, meyvə və paxlalılar bağırsaq fəaliyyətinin tənzimlənməsinə kömək edə bilər. Lakin əməliyyatdan dərhal sonra lifin miqdarını kəskin artırmaq düzgün deyil, qaz və qarında spazm yarada bilər. Lif tədricən artırılmalıdır.
Əsas problem çox vaxt bir dəfəyə böyük miqdarda yağ qəbul edilməsidir. Ona görə xüsusilə ilk həftələrdə aşağıdakı qidaları azaltmaq faydalı ola bilər: qızardılmış yeməklər, çox yağlı ət, quyruq yağı və çox yağlı xörəklər, fast-food, yağlı souslar və mayonez, çox yağlı süd məhsulları, qaymaq və çox yağlı pendirlər, çox yağlı şirniyyat və xəmir məmulatları.
Bütün insanlara ömürlük ciddi yağsız pəhriz lazım deyil. Əgər insan yağlı qidalara normal dözürsə, zamanla sağlam yağları da rasionuna daxil edə bilər. Əsas məsələ balanslı qidalanmaq və həddindən artıq yağ qəbul etməməkdir.
Bəzi insanlarda əməliyyatdan sonra kofein bağırsaq hərəkətlərini sürətləndirərək ishalı artıra bilər. Buna görə çay və qəhvədən sonra qarında narahatlıq və ya ishal yaranırsa, onların miqdarını azaltmaq məqsədəuyğundur. Eyni zamanda, çox şirin qidalar da bəzi insanlarda ishalı gücləndirə bilər.
Əməliyyatdan sonra bəzi insanlarda süd məhsullarına qarşı müvəqqəti həssaslıq yarana bilər. Süd, qaymaq və yağlı pendirdən sonra köp və ya ishal yaranırsa, onların miqdarını azaltmaq və daha az yağlı alternativlərə üstünlük vermək olar.
Öd kisəsi çıxarıldıqdan sonra hamıya eyni qida qadağası tətbiq etmək düzgün deyil. Bir insanın problem yaşadığı qida digər insanda heç bir narahatlıq yaratmaya bilər. Buna görə pasiyent hansı qidadan sonra köp, qarın ağrısı və ya ishal yarandığını müşahidə etməli və həmin qidanı müəyyən müddət azaltmalıdır.
Öd kisəsi əməliyyatından sonra bəzi insanlarda ishal yarana bilər. Bunun səbəblərindən biri ödün bağırsağa daha davamlı axması və öd turşularının bağırsaqda işlədici təsir göstərməsidir. Adətən bu problem zamanla azalır, lakin davamlı və ya şiddətli ishal mütləq həkim tərəfindən qiymətləndirilməlidir.
Əgər səbəbsiz arıqlama, güclü qarın ağrısı, sarılıq, davamlı qusma və ya uzunmüddətli ishal varsa, bunu sadəcə “öd kisəm yoxdur” deyərək izah etmək olmaz və həkimə müraciət edilməlidir.
Öd kisəsi olmayan insan ömürlük pəhriz saxlamağa məcbur deyil. Əksər insanlar öd kisəsi olmadan tam normal həyat keçirə və sağlam, balanslı qidalana bilirlər. Xüsusi qida məhdudiyyətləri daha çox əməliyyatdan sonrakı erkən dövrdə və müəyyən qidalara fərdi dözümsüzlük olduqda lazım gəlir.
Az-az və balanslı qidalanmaq, çox yağlı və qızardılmış yeməkləri həddindən artıq qəbul etməmək, lifli qidaları tədricən artırmaq və orqanizmin reaksiyasını nəzərə almaq lazımdır. Sağlam qidalanma, normal bədən çəkisinin qorunması və müntəzəm fiziki aktivlik də həzm sisteminin ümumi sağlamlığı üçün əhəmiyyətlidir".
