Ölkə.az xəbər verir ki, hadisə Meksikanın Hidalqo ştatında, Deportivo 11 de Julio idman kompleksində keçirilən güləş nümayişi zamanı baş verib.
“El Búho” ləqəbi ilə tanınan Pineda əsas qarşılaşmada hakimlik edib. Görüş zamanı o, nümayişin bir hissəsi olaraq güləşçilərin fiziki hərəkətlərinə cəlb olunub. Bundan sonra hakim qəfil yerə yıxılıb və rinqdə hərəkətsiz qalıb.
Hadisəni görən təşkilatçılar qarşılaşmanı dərhal dayandıraraq tibbi yardım çağırıblar. Rinqə daxil olan tibb əməkdaşları Pinedanın həyat əlamətlərinin olmadığını müəyyən ediblər.
Hadisənin “piledriver” adlanan güləş hərəkəti ilə əlaqəli ola biləcəyi ehtimal edilir. Bu hərəkət zamanı rəqib başıaşağı vəziyyətdə saxlanılaraq yerə doğru endirilir.
Bununla belə, hakimin ölümünün dəqiq səbəbi hələ açıqlanmayıb. Faktla bağlı araşdırma başladılıb və ölüm səbəbinin tibbi ekspertizadan sonra dəqiqləşdiriləcəyi bildirilib.(Musavat.com)
