Ukrayna Prezidenti Volodimir Zelenski ölkə ərazisinin təxminən 25 faizinin itirilməsi ilə nəticələnə biləcək və hazırkı cəbhə xətti boyunca döyüşlərin dayandırılmasını nəzərdə tutan sülh razılaşmasının mümkünlüyünü istisna etməyib.
Modern.az xəbər verir ki, o bu barədə ABŞ-nin “Fox News” telekanalına müsahibəsində danışıb.
Jurnalist Zelenskidən münaqişənin hazırkı mövqelərdə dondurulmasını və Kiyevin ölkə ərazisinin dörddə üçünü və ya daha çoxunu öz nəzarətində saxlamasını nəzərdə tutan razılaşmanı qəbul edib-etməyəcəyini soruşub.
“Bəli. Əgər biz elə indi hər şeyi dondurmalı olsaq, düşünürəm ki, bu, müharibəni başa çatdırmaq üçün real yoldur”, – deyə Zelenski cavab verib.
Beləliklə, Ukrayna lideri hazırkı cəbhə xətti boyunca döyüşlərin dayandırılmasını müharibənin sona çatdırılması üçün mümkün variantlardan biri kimi dəyərləndirib. Bununla belə, onun açıqlaması ərazi güzəştlərini nəzərdə tutan konkret sülh sazişinin imzalanmasına razılıq verdiyi anlamına gəlmir.
