Almaniyanın “Bavariya” futbol komandası Bundesliqada Dortmund “Borussiya”sı ilə keçirilən görüşdən sonra ciddi kadr problemləri ilə üzləşib.
İdman.Biz xəbər verir ki, 2:2 hesabı ilə başa çatan qarşılaşmada Münhen təmsilçisinin üç futbolçusu zədə səbəbindən meydanı vaxtından əvvəl tərk edib.
İlk olaraq mərakeşli hücumçu İsmayıl Saybari zədələnib. O, rəqib qapıçı Qreqor Kobellə top uğrunda mübarizə zamanı ayağından xəsarət alıb və qarşılaşmanı davam etdirə bilməyib.
Ardınca Serj Qnabri də zədə səbəbindən əvəzlənib. Almaniyalı futbolçunun meydanı tərk etməsindən sonra “Bavariya”nın hücum xəttindəki seçim imkanları daha da məhdudlaşıb.
Komandanın Fransa millisinin üzvü Maykl Olise də ikinci hissədə zədələnərək əvəzlənməsini istəyib.
Qeyd olunur ki, Dortmund “Borussiya”sı ilə görüşə qədər də “Bavariya”nın heyətində ciddi itkilər var idi. Qapıçı Manuel Noyer, yarımmüdafiəçi Camal Musiala və hücumçu Luis Dias zədə səbəbindən qarşılaşmada iştirak etməyiblər.
Münhen təmsilçisinin hücum xəttində əsas seçimlər Harri Keyn və Lennart Karl olaraq qalır. Komandanın məşqçilər heyəti hücum mövqelərində Alfonso Deyvis və
Nataniel Braundan da istifadə etmək məcburiyyətində qala bilər.
Yeni zədələrin nə dərəcədə ciddi olduğu və futbolçuların nə vaxt meydana qayıdacaqları hələ dəqiqləşməyib.
Qeyd edək ki, “Bavariya” Bundesliqanın növbəti turunda Dortmund “Borussiya”sı ilə 2:2 hesablı heç-heçə edib.
