“Neftçi” Misli Premyer Liqasının X turunda “Şamaxı”ya qalib gəlib – 3:2.
Oyundan sonra “ağ-qaralar”ın yarımmüdafiəçi İfeanyi Metyu “Futbolpress.az“ın suallarını cavablandırdı:
– Matçı şərh edərdiniz.
– Yaxşı oynadıq və qələbə qazandıq. Bu görüşün əhəmiyyətini bilirdik. Sona qədər mübarizə apardıq və vacib üç xal əldə etdik.
– Rəqib iki dəfə hesabı bərabərləşdirdi. Nə üçün üstünlüyünüzü qoruya bilmədiniz?
– “Şamaxı”nı da qeyd etmək lazımdır. Onlar da yaxşı mübarizə apardılar. Əlimizə şanslar düşdü, dəyərləndirə bilmədik. Fürsətləri qola çevirə bilsəydik, hesab fərqli ola bilərdi.
– Meydançanın süni örtüklü olması nəticəyə nə dərəcədə təsir etdi?
– Belə meydançalarda oynamaq çətindir. Buna görə müəyyən sıxıntılarımız oldu, topla istədiyimiz kimi davrana bilmirdik. Amma əsas nəticədir və istədiyimizi də əldə etdik.
– Bu qələbə sayəsində turnir cədvəlində birinci pilləyə yüksəldiniz. “Taxtı” qorumaq çətin olmayacaq?
– Liderliyə yüksəldiyimiz üçün sevincliyik. Məqsədimiz mövqeyimizi qorumaqdır. Sona qədər bunun üçün mübarizə aparacağıq.
Şahin Cəfərov
