ABŞ-ın Oreqon ştatının şimal-qərbində, aeroport yaxınlığında iki helikopterin havada toqquşması nəticəsində 3 nəfər həlak olub.
Bizim.Media "CNN" telekanalına istinadən xəbər verir ki, Yemhill dairəsi şerif idarəsinin məlumatına görə, xilasedicilər helikopterlərin qalıqlarını Portlenddən təxminən 40 mil cənub-qərbdə yerləşən Makminnvill bələdiyyə aeroportu yaxınlığındakı xüsusi kənd təsərrüfatı sahasində tapıblar.
Məlumata görə, helikopterlərdən birində Teksasdan olan 22 yaşlı uçuş təlimatçısı Meddi Asbo (Maddie Asbo) və onun tələbəsi, Böyük Britaniya vətəndaşı olduğu ehtimal edilən kursant olub.
İkinci helikopteri isə Oreqon ştatının 38 yaşlı sakini Tayler Sterdevant (Tyler Sturdevant) idarə edib.
"Hər üç şəxs qəza yerində dünyasını dəyişib", — deyə Yemhill dairəsinin şərifi Semyuel C. Elliott sosial şəbəkə hesabında bildirib.
Hadisənin başvermə səbəbləri ABŞ Federal Aviasiya Administrasiyası və Milli Nəqliyyat Təhlükəsizliyi Şurası tərəfindən araşdırılır.
Bizim.Media
