Avropa İttifaqı rusiyalı turistlər üçün viza qaydalarının daha da sərtləşdirilməsini nəzərdən keçirir. Avropa Komissiyasının yeni təklifləri 2027-ci ilin yanvarında təqdim etməsi gözlənilir.
Banker.az “Politico”ya istinadən xəbər verir ki, İsveçin ədliyyə naziri Gunnar Strömmer Aİ-də mövcud viza rejiminin təhlükəsizlik baxımından zəif nöqtələr yaratdığını bildirib. Onun sözlərinə görə, Komissiya yeni tədbirlər paketi üzərində işləyir və İsveç bunun daha tez tətbiqini istəyir.
Müzakirələrin əsas mövzularından biri rusiyalılara verilən çoxgirişli Şengen vizalarıdır. Bununla belə, Aİ artıq 2025-ci ilin noyabrında Rusiya vətəndaşlarına yeni çoxgirişli vizaların verilməsini xeyli məhdudlaşdırıb və ümumi qayda olaraq onların hər səfər üçün ayrıca viza almasını tələb edib. Yalnız bəzi istisna kateqoriyalar saxlanılıb.
Sərtləşdirmə təşəbbüsü yeni deyil. 2026-cı ilin iyununda İsveç, Polşa, Estoniya, Finlandiya, Çexiya və digər ölkələrin nazirləri Aİ daxilində rusiyalı turistlər üçün daha vahid və sərt viza siyasəti tələb edən birgə bəyanat yayıblar.
2025-ci ildə Rusiya vətəndaşlarına təxminən 478 min Şengen vizası verilib. Hazırkı müzakirələr əvvəl verilmiş vizaların taleyi, üçüncü ölkələrdə yaşayan rusiyalıların müraciət imkanları və əlavə təhlükəsizlik məhdudiyyətlərinin forması üzərində cəmlənir.
