"The Times of Israel" nəşrinin məlumatına görə, İsrailin Baş naziri Benyamin Netanyahu bildirib ki, 2025-ci ilin iyulunda İsrailin Dəməşqə endirdiyi zərbələrdən sonra o, Suriya Prezidenti Əhməd əl-Şəra ilə telefon danışığı aparıb.
Netanyahunun sözlərinə görə, bu söhbətdən sonra Suriyanın cənubunda druzların kütləvi şəkildə öldürülməsi dayanıb. İsrail lideri bu barədə "Likud" partiyasının druz icmasına həsr olunmuş konfransında danışıb. Netanyahu bildirib: "Mən telefonu götürüb əl-Şəraya zəng etdim. Bu, çox qısa və olduqca sərt bir söhbət idi. Və Suriyada druzların qətlə yetirilməsi dayandı". Bu, Netanyahu ilə əl-Şəra arasında birbaşa danışığın olduğu barədə ictimaiyyətə məlum olan ilk məlumatdır. Əl-Şəra hakimiyyətə 2024-cü ilin sonlarında, uzun illər Suriyaya rəhbərlik etmiş Bəşər Əsədin devrilməsindən sonra gəlib. İsrail və Suriya arasında diplomatik əlaqələr yoxdur və onlar bir neçə dəfə müharibə aparıblar; buna görə də, bu söhbət iki ölkə liderləri arasında tarixdəki ilk birbaşa təmas ola bilər. 2025-ci ilin iyulunda İsrail Dəməşqdəki Suriya Müdafiə Nazirliyinə və prezident sarayının yaxınlığındakı obyektlərə zərbələr endirib. İsrail rəsmiləri bildiriblər ki, əməliyyatın məqsədi Suriyanın cənubunda – əsasən druz icması üzvlərinin məskunlaşdığı Əs-Suveyda bölgəsində icmalararası toqquşmaların baş verdiyi ərazidə druzları qorumaq olub. Konfrans iştirakçılarına müraciət edən Netanyahu: "Bizim qardaşlarımızı və sizin qardaşlarınızı qorumaq üçün əlimdən gələni edəcəyəm", – deyə bildirib.
Hazırda İsrail və əl-Şəra hökuməti təhlükəsizlik sazişi ilə bağlı danışıqlar aparırlar. Suriya tərəfi İsrail qüvvələrinin sərhəd boyu yerləşən bufer zonasından – Əsədin devrilməsindən sonra İsrail Müdafiə Qüvvələri tərəfindən işğal edilmiş ərazidən çıxarılmasını tələb edir.
SAMİRƏ
