Amerikalı tanınmış jurnalist Taker Karlson İsrailin Baş naziri Binyamin Netanyahunun ABŞ Prezidenti Donald Trampı İrana qarşı nüvə silahından istifadə etməyə inandırmaq üçün gərgin kampaniya apardığını bildirib. İddiaya görə, ola biləcək nüvə hücumunun hədəfində İranın gizli yeraltı obyekti yer alır, Vaşinqton rəhbərliyi daxilində isə sərt diplomatik və hərbi çəkişmə yaşanır.
Dünya ictimaiyyətində əks-səda doğuran kulis məlumatları ilə tanınan amerikalı jurnalist Taker Karlson "X" sosial şəbəkə platforması vasitəsilə yaydığı geniş açıqlamalarla Vaşinqton və Təl-Əviv xəttini silkələyəcək iddialar irəli sürüb. Karlson İsrailin Baş naziri Binyamin Netanyahunun İrana qarşı nüvə hücumu təşkil olunması məsələsində ABŞ Prezidenti Donald Trampa hər gün təzyiq göstərdiyini iddia edib. Karlsonun iddialarına əsasən, ola biləcək əməliyyatın əsas hədəfi İranın mərkəzi hissələrində yerləşən və "Pikkaks Dağı" kimi tanınan yeraltı nüvə obyekti olacaq. İsrail kəşfiyyatının bu obyektdə uranın zənginləşdirilməsi fəaliyyətini yenidən başlatdığını irəli sürdüyünü qeyd edən jurnalist həmin obyektin qalın qranit qaya təbəqələrinin altında yerləşdiyini vurğulayıb.
Karlson ABŞ-nin malik olduğu adi (klassik) silahların bu dərinlikdəki qurğunu tamamilə məhv etməyə gücünün çatmayacağını, məhz buna görə də Netanyahunun nüvə silahından istifadə olunmasında təkid etdiyini irəli sürüb. Ancaq bu iddialar nə ABŞ və İsrailin rəsmi qurumları, nə də müstəqil beynəlxalq mənbələr tərəfindən təsdiqlənib.
Kulis məlumatı paylaşdığını deyən Karlson Netanyahunun ölkəsindəki siyasi çıxılmazlıq vəziyyətinə görə Trampın dəstəyinə möhtac olduğunu bildirib. İsrail Baş nazirinin parlamentdə çoxluğu təmin etmək və iqtidarını qorumaq üçün ABŞ liderinin dəstəyini arzuladığını iddia edən jurnalist "Bibi bu məsələni müzakirə etmək üçün Trampı hər gün zəng edib axtarır" ifadələrini işlədib. Bununla yanaşı, ABŞ rəhbərliyindəki bəzi yüksək vəzifəli "şahinlərin" də İrana qarşı hərbi əməliyyatları dəstəklədiyi irəli sürülüb. Karlson ABŞ-nin müdafiə naziri Pit Heqset, dövlət katibi Marko Rubio və Mərkəzi Kəşfiyyat İdarəsinin (MKİ) direktoru Con Ratkliffin bu qrupda yer aldığını iddia edib. Trampın hələ qəti qərarını vermədiyini diqqətə çatdıran Karlson ABŞ Prezidentinin 7 noyabr tarixinə qədər nüvə silahından istifadə olunması və ya hərbi əməliyyatla bağlı qərar qəbul edə biləcəyini iddia edib. Vaşinqton rəhbərliyi daxilində fərqli fikirlərin mövcudluğunu vurğulayan jurnalist vitse-prezident Cey Di Vens ilə xüsusi nümayəndə Stiv Uitkoffun isə hərbi variantlar əvəzinə İranla diplomatik sazişə nail olunmasının mümkünlüyünü müdafiə etdiyini bildirib.
Daha əvvəl oktyabrın 16-da açıqlama verən Donald Tramp "Pikkaks Dağı"na qarşı ola biləcək hücum ehtiyatsızlığını istisna etməmiş, lakin nüvə silahından istifadə edilməsini düşünmədiyini söyləmişdi. Digər tərəfdən, Qətərin paytaxtı Dohada iranlı danışıqlar aparanlar və qətərli vasitəçilərin iştirakı ilə dolayı diplomatik təmasların davam etdiyi, tərəflərin mümkün sülh sazişi layihəsi üzərində işlədiyi məlumdur.
İrana qarşı ola biləcək nüvə hücumunun gözlənilən nəticələri barədə sərt xəbərdarlıqlar edən Taker Karlson bunun təkcə regional deyil, bütün dünyanı sarsıdacaq fəlakətlərə yol aça biləcəyini qeyd edib. Zərbə nəticəsində yaranacaq radioaktiv materialların Fars körfəzinə yayılacağını, su ehtiyatlarını çirkləndirərək milyonlarla insanın həyatını təhlükə altında qoyacağını vurğulayan Karlson bu vəziyyətin digər nüvə dövlətlərini də oxşar addımlar atmağa sövq edərək qlobal miqyasda yeni qarşıdurmaların yolunu aça biləcəyi barədə xəbərdarlıq edib.
Rasim
"AzPolitika.info"
