Bakı. Trend:
Fransada oktyabrın 17-dən bəri davam edən etiraz aksiyaları və iğtişaşlar zamanı 2513 nəfər saxlanılıb, daha 67 nəfər barəsində həbs qətimkan tədbiri tətbiq edilib.
Bu barədə Fransanın ədliyyə naziri Jerald Darmanen TF1 telekanalına müsahibəsində məlumat verib.
Limoges şəhərində iğtişaşçılar tərəfindən bələdiyyə binasının yandırılması və nəticədə binanın zəng qülləsinin tamamilə dağılmasını şərh edən nazir Milli Terrorla Mübarizə Prokurorluğunun yaxın vaxtlarda istintaqa qoşula biləcəyini bildirib.
Qeyd edək ki, oktyabrın 17-də Parisdə və Fransanın digər şəhərlərində yanacağın qiymətinin artmasına və əhalinin alıcılıq qabiliyyətinin azalmasına etiraz olaraq kütləvi nümayişlər keçirilib. Aksiyaların təşkilatçıları iştirakçıların sayının 800 min nəfər olduğunu bildirsələr də, Fransanın Daxili İşlər Nazirliyi bu rəqəmin 550 min nəfər təşkil etdiyini açıqlayıb.
Bir sıra şəhərlərdə nümayişlər iğtişaşlara və polis ilə etirazçılar arasında toqquşmalara çevrilib. Fransanın daxili işlər naziri Loran Nunyes iğtişaşlarda və talanlarda iştirak edən şəxslərin məsuliyyətə cəlb olunacağını bildirib.
