İndi Ukraynada sülh danışıqları üçün gözlər noyabr ayına yönəlib. Zelenski ABŞ, Rusiya və Ukrayna nümayəndə heyətlərinin üçtərəfli görüş keçirəcəyini açıqlayıb. Görüşün yeri hələlik bəlli olmasa da, Ukrayna lideri ərazi məsələsinin yalnız liderlər səviyyəsində müzakirə edilə biləcəyini vurğulayıb.
Tezadlar.az xəbər verir ki, Ukrayna münaqişəsində dalana dirənmiş sülh danışıqları yenidən başlaya bilər. Ukrayna prezidenti Vladimir Zelenski ABŞ, Rusiya və Ukrayna nümayəndə heyətlərinin noyabr ayında görüşəcəyini açıqlayıb. Görüşün yeri hələlik bəlli deyil.
“Amerikalılarla danışdıq. Onlar həmçinin Sankt-Peterburqa getdilər. Münaqişənin hər iki tərəfi, Rusiya və Ukraynanın haradasa üçtərəfli görüşə hazır olduqları barədə razılıq əldə edildi. Əbu-Dabidən bəhs edildi. Lakin görüş Yaxın Şərqdə olmaya bilər. O, istənilən Avropa paytaxtında keçirilə bilər. Amma biz razılığa gəldik. Amerikalılardan da təsdiq aldıq. Putin həmçinin onlara ABŞ, Rusiya və Ukrayna nümayəndə heyətlərinin noyabr ayında üçtərəfli görüş keçirəcəyini təsdiqlədi. Əlbəttə ki, Avropanın da prosesdə iştirak etməsi bizim üçün çox vacibdir”, – Ukrayna Prezidenti Vladimir Zelenski deyib.
Ukrayna televiziyasında çıxış edən Zelenski Amerika rəsmilərindən təsdiq aldıqlarını söyləyib. O, Rusiya Prezidenti Vladimir Putinin də üçtərəfli görüşə razılıq verdiyi barədə məlumatlandırıldıqlarını bildirib. O, Avropanın prosesdə iştirakına çağırıb. O, Kiyevin məqsədinin nümayəndə heyətləri arasında təmasların liderlər səviyyəsində görüş üçün yol açmaq olduğunu vurğulayıb.
Ukrayna lideri danışıqlardakı qırmızı xətlərini də sadalayıb. O, ordunun məhdudlaşdırılmasının və Ukraynanın neytrallığının müzakirə mövzusu olmadığını söyləyib. O, Rusiyanın təhlükəsizlik zəmanətlərini diktə edə bilməyəcəyini vurğulayıb.
“Buna baxmayaraq, mövqeyimiz aydındır: təhlükəsizlik zəmanətlərimiz bizə məxsusdur. Rusiya tərəfi onları tətbiq edə bilməz. Buna görə də nəticə aydındır: ordumuzu məhdudlaşdırmaq və Ukraynanın neytrallığı müzakirə mövzusu deyil. Ərazi məsələsi bizim qırmızı xəttimizdir. Bu məsələ yalnız liderlər səviyyəsində müzakirə edilə bilər”, – Ukrayna Prezidenti Vladimir Zelenski söyləyib.
Zelenskinin sözlərinə görə, ABŞ tez-tez ərazi mübadiləsi məsələsini qaldırır. Lakin Kiyev ərazi məsələsinin yalnız liderlər səviyyəsində həll edilə biləcəyini iddia edir. O, həmçinin digər mövzuların texniki qruplar tərəfindən müzakirə edilə biləcəyi mesajını çatdırıb.
ELBAR
