ABŞ-nin 3 yanvarda hərbi müdaxiləsi nəticəsində saxlanılan Venesuela prezidenti Nikolas Maduro və həyat yoldaşı Siliya Floresə qarşı Nyu-Yorkda iş materiallarına yeni ittihamlar əlavə edilib.
Tezadlar.az xəbər verir ki, ABŞ Ədliyyə Nazirliyinin veb saytında dərc olunmuş açıqlamaya görə, federal prokurorlar Maduronun 2013-cü ildən başlayaraq siyasi müxaliflərə qarşı “dövlət tərəfindən dəstəklənən işgəncə və repressiya sistemini təsdiqlədiyini” və həyat yoldaşı Floresin “rejimin istifadə etdiyi zorakılıq mexanizmlərinin inkişafına kömək etdiyini” iddia ediblər.
Məlumatda Nyu-Yorkun Cənub Dairəsi üzrə ABŞ prokuroru Ceymi Makdonaldın “Bugünkü əlavə ittiham aktında ətraflı şəkildə göstərildiyi kimi, Nikolas Maduro Moros və Siliya Adela Flores De Maduro əvvəllər ittiham olunan narkotik qaçaqmalçılığı və silah cinayətlərinə əlavə olaraq, ABŞ vətəndaşlarına işgəncə vermək də daxil olmaqla, 20 ildən çox müddət ərzində işgəncə cinayətləri törətmək üçün əlbir olublar” dediyi bildirilir.
Bildirilir ki, Maduro və həyat yoldaşı onlara qarşı irəli sürülən ittihamlar üzrə ən azı 10 ildən ömürlük həbs cəzasına qədər cəza ilə üzləşirlər.
FTB direktoru Patelin açıqlaması
FTB direktoru Kaş Patel ABŞ-da yerləşən X şirkətinin sosial media platforması hesabında Venesuela prezidenti Maduro və həyat yoldaşı Floresə qarşı “işgəncə törətmək üçün sui-qəsd” ittihamları ilə yeni federal ittihamların irəli sürüldüyünü açıqlayıb.
Patel bildirib ki, “İttihamnamədə iddia edildiyi kimi, Maduro rejimi Venesuela hökumətinin nəzarətində saxlanılan ondan çox Amerika vətəndaşına işgəncə verib; bu işgəncələrə narkotik maddələrin verilməsi, elektrik şoku, cinsi təcavüz və daha çox şey daxil idi. İndi onlar cinayətlərinə görə məsuliyyət daşıyacaqlar”.
Nə baş verdi?
Yanvarın 3-də Venesuelanın paytaxtı Karakasda partlayışlar və təyyarə səsləri eşidilib. Partlayışlardan sonra Venesuela hökuməti ABŞ-ı ölkənin müxtəlif yerlərindəki mülki və hərbi obyektlərə hücum etməkdə günahlandırıb.
ABŞ prezidenti Donald Tramp Venesuela prezidenti Nikolas Maduroya qarşı genişmiqyaslı hücumun başlandığını və Maduro və həyat yoldaşının ölkədən təxliyə edildiyini açıqlayıb.
ABŞ-nin o vaxtkı baş prokuroru Pam Bondi Maduro və həyat yoldaşı Floresə qarşı ABŞ-da ittihamların irəli sürüldüyünü və Maduronun “narkotik terrorizmi, kokain qaçaqmalçılığı və ABŞ-a qarşı pulemyot və təxribat qurğuları saxlamaq” ittihamları ilə üzləşdiyini açıqlayıb.
Maduro və həyat yoldaşı 3 yanvardan bəri Nyu-Yorkun Bruklin şəhərindəki Metropoliten Təcridxanasında saxlanılırlar.
ELBAR
