Kanadanın Baş naziri Mark Karni və ABŞ Prezidenti Donald Tramp uzun müddətdir davam edən ikitərəfli ticarət mübahisəsi barədə telefonla danışıblar.
Tezadlar.az xəbər verir ki, Karni Trampla telefon danışığını sosial media hesabında açıqlayıb.
O, ABŞ və Kanada arasında ticarətin gələcəyi ilə bağlı “yaxşı” söhbət etdiklərini bildirib və əlavə edib: “Bu, işçilərimiz üçün iş yerləri yaradacaq, ailələrin alıcılıq qabiliyyətini artıracaq və Kanadanın dillərinə, mədəniyyətinə və suverenliyinə tam hörmət edəcək qarşılıqlı faydalı ticarət müqaviləsini müəyyən edən son konstruktiv müzakirələrimizin davamıdır.”
Karni bildirib ki, komandaları yaxın həftələrdə bu məqsədə doğru çalışacaqlar.
ABŞ və Kanada arasında gərginlik, xüsusən də Trampın ikinci müddətində, tariflər və ticarət siyasəti səbəbindən artıb.
27 oktyabrda Kanadanın Baş naziri Karni bildirib ki, ABŞ onun “qırmızı xətlərini” qəbul edərsə, ABŞ ilə ticarət razılaşmasının əldə edilməsi ehtimalı artacaq.
Miçiqanda seçki kampaniyası çıxışı zamanı ABŞ Prezidenti Tramp Kanada ilə ticarət məsələsinin “tezliklə həll olunacağını” bildirib.
ELBAR
