Böyük Britaniya hökuməti Brexitdən sonra AB vətəndaşlarının ölkədə yaşamaq və işləmək hüquqlarının yenidən qurulması variantını nəzərdən keçirir.
Tezadlar.az xəbər verir ki, Brexitdən sonra Böyük Britaniya və Avropa Birliyi (AB) arasında münasibətlərin gələcəyi ilə bağlı müzakirələr yenidən başlayıb.
Tərəflərin vətəndaşların qarşılıqlı hərəkətini asanlaşdıracaq tənzimləmələrə diqqət yetirdikləri bildirilir.
Böyük Britaniyanın biznes naziri Conatan Reynolds noyabr ayında keçirilməsi planlaşdırılan Böyük Britaniya-AB sammitindən əvvəl ticarət maneələrinin azaldılması və gənclərin qarşılıqlı hərəkətliliyi kimi məsələlərin müzakirə olunduğunu bildirib.
Müzakirələrdə Britaniya və AB vətəndaşlarının bir-birinin ölkələrində yaşamasına və işləməsinə imkan verən sərbəst hərəkət müqaviləsinin yenidən tətbiq edilməsi ehtimalı da qaldırılıb.
Baş nazir Endi Bernhem iddia edib ki, AB ilə uzunmüddətli münasibətlərin gələcəyi açıq şəkildə müzakirə olunmalı və mümkün variantların üstünlükləri və çatışmazlıqları qiymətləndirilməlidir. Lakin, sərbəst hərəkətin yenidən tətbiqi ilə bağlı hələlik yekun qərar verilməyib.
Digər tərəfdən, potensial dəyişiklik siyasi müzakirələrə də səbəb olub.
Böyük Britaniyanın İslahat Partiyasının lideri Naycel Faraj sərbəst hərəkətin bərpasını tənqid edib, bəzi Leyborist millət vəkilləri də Brexit müzakirələrinin yenidən alovlanmasına ehtiyatla yanaşıblar.
10 il əvvəl AB-dən çıxdı
Böyük Britaniya 2016-cı ildə keçirilən referendumdan sonra Avropa Birliyindən çıxıb.
Brexit AB vətəndaşlarının Böyük Britaniyada sərbəst yaşamaq və işləmək hüququna son qoyub.
Əgər sərbəst hərəkət yenidən tətbiq olunarsa, hər iki tərəfin vətəndaşlarının qarşılıqlı hərəkət hüquqlarının yenidən müəyyən edilməsi lazım gələ bilər.
ELBAR
