BAKI, 21 oktyabr. TELEQRAF
ABŞ Prezidenti Donald Tramp Rusiya lideri Vladimir Putin və Çin Xalq Respublikasının Sədri Si Cinpinlə üçtərəfli sammit keçirməyə çalışır. Belə bir görüş dünyanın yenidən təsir dairələrinə bölünməsi ilə nəticələnə bilər.
Teleqraf xəbər verir ki, bu barədə “The Wall Street Journal” (WSJ) qəzetinin redaksiya məqaləsində bildirilib.
Nəşr mümkün üçtərəfli görüşü 1945-ci ildə keçirilmiş Yalta konfransı ilə müqayisə edib.
Məqalədə qeyd olunur ki, Tramp uzun müddətdir Rusiya və Çinlə genişmiqyaslı razılaşmalar əldə etməkdə maraqlıdır. Qəzetin redaksiyası hesab edir ki, ABŞ administrasiyasının Ukrayna və Avropaya münasibətdə hazırkı siyasəti daha böyük geosiyasi strategiyanın tərkib hissəsi ola bilər.
WSJ-nin fikrincə, Vaşinqtonun Rusiya nefti və dizel yanacağına tətbiq edilən bəzi sanksiya məhdudiyyətlərini yumşaltması Moskva ilə daha geniş razılaşmalara nail olmaq istəyindən irəli gələ bilər.
Qəzetin qiymətləndirməsinə görə, belə razılaşmalar NATO daxilində parçalanmaya, ABŞ-nin Sakit okean regionundakı mövqelərinin zəifləməsinə və Çinin Tayvana təzyiqinin artmasına səbəb ola bilər.
Bununla yanaşı, WSJ-nin digər məlumatına əsasən, üçtərəfli görüş təşəbbüsünü Putin irəli sürüb. Tramp isə Rusiya və Çin liderləri ilə görüşə açıq olduğunu, lakin əsasən nüvə silahlarının azaldılması məsələsini müzakirə etmək istədiyini bildirib.
Qeyd: Dünyanın təsir dairələrinə bölünməsi ilə bağlı fikirlər WSJ redaksiyasının siyasi qiymətləndirməsidir. Belə bir razılaşmanın əldə olunduğuna dair təsdiqlənmiş məlumat yoxdur.
