BAKI, 14 oktyabr. TELEQRAF
Liviya genişmiqyaslı müharibə mərhələsini geridə qoysa da, ölkədə siyasi böhranın yeni formada təkrarlanması təhlükəsi qalmaqdadır.
Teleqraf xəbər verir ki, bunu Liviyanın İrandakı səfiri Əli Cümə Həsən Fadil TASS-a müsahibəsində bildirib.
Diplomat IX “Şimali Qafqaz: dialoq, ənənələr və inkişaf məkanı” Beynəlxalq Forumu çərçivəsində ölkəsindəki mövcud vəziyyəti qiymətləndirib.
“Liviyadakı hazırkı vəziyyəti nisbi, lakin hələ tamamlanmamış sabitlik kimi xarakterizə etmək olar. Ölkə əvvəlki illərə xas olan genişmiqyaslı müharibə mərhələsindən uzaqlaşıb. Bununla belə, yekun siyasi və institusional nizamlanma hələ əldə edilməyib. Böyük müharibənin olmaması özlüyündə tam sülhün bərqərar olması demək deyil”, – səfir vurğulayıb.
Onun sözlərinə görə, Liviya böhranı yalnız ayrı-ayrı siyasi qüvvələr arasında razılaşma əldə olunması ilə həll edilə bilməz.
Diplomat bildirib ki, ölkədə dövlət institutlarının legitimliyi, seçkilərin konstitusion-hüquqi əsasları, səlahiyyət və resursların bölüşdürülməsi, təhlükəsizlik strukturlarının birləşdirilməsi, mərkəzi hakimiyyətlə regionlar arasındakı münasibətlər və milli barışıq kimi məsələlər kompleks şəkildə həll olunmalıdır.
“Bu problemlər aradan qaldırılmadan yalnız yeni hökumətin formalaşdırılması ilə məhdudlaşan həll yolu böhranın başqa formada yenidən yaranmasına səbəb ola bilər”, – Fadil qeyd edib.
Səfirin fikrincə, davamlı sabitliyə nail olmaq üçün ölkədə geniş siyasi kompromis əldə edilməli, razılaşdırılmış seçki qaydaları hazırlanmalı və nəticələrin tanınmasına təminat verilməlidir.
O, həmçinin bütün ölkə ərazisində fəaliyyət göstərə bilən dövlət institutlarının yaradılmasını, dövlət resurslarının şəffaf və ədalətli idarə olunmasını, hərbi və təhlükəsizlik strukturlarının birləşdirilməsini vacib sayıb.
Diplomat vurğulayıb ki, inzibati mərkəzsizləşdirmənin genişləndirilməsi də zəruridir. Onun sözlərinə görə, heç bir region dövləti yalnız bir coğrafi ərazinin və ya siyasi mərkəzin inhisarında olan qurum kimi qəbul etməməlidir.
