BAKI, 22 oktyabr. TELEQRAF
Avropa İttifaqında (Aİ) Rusiya Prezidenti Vladimir Putinlə birbaşa danışıqlar aparmaq üçün xüsusi nümayəndənin müəyyənləşdirilməsi məsələsi müzakirə olunur.
Teleqraf xəbər verir ki, bu barədə “Politico” nəşri məlumat yayıb.
Nəşrin yazdığına görə, Çexiya Prezidenti Petr Pavel Aİ ölkələrinin Rusiya ilə dialoq aparmaq üçün vahid nümayəndə və ya səlahiyyətli nümayəndələr qrupu müəyyənləşdirməli olduğunu bildirib.
Avropalı diplomatlardan biri qeyd edib ki, danışıqlarda ayrı-ayrı şəxslərin eyni vaxtda Aİ adından çıxış etməsi səmərəli deyil.
“Biz hər biri Avropa İttifaqı adından danışan iki-üç nəfərlə danışıqlara gedə bilmərik”, – diplomat vurğulayıb.
Onun sözlərinə görə, nümayəndə seçilərkən daxili siyasi maraqlar deyil, danışıqların nəticəliliyi əsas götürülməlidir.
Mümkün namizədlər arasında Avropa Komissiyasının Prezidenti Ursula fon der Lyayen, Avropa İttifaqı Şurasının Prezidenti Antonio Koşta və Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallasın adları çəkilir.
Bununla belə, bəzi avropalı diplomatlar Finlandiya Prezidenti Aleksandr Stubbun bu missiya üçün daha uyğun namizəd olduğunu düşünürlər.
Hələlik Putinlə danışıqları kimin aparacağı barədə yekun qərar qəbul edilməyib.
