RTX 3080 qrafik kartı yan hava girişində 14°C daha sərin işləyib

    “TrashBench” ləqəbli kompüter həvəskarı “RTX 3080” qrafik kartını masaüstü kompüter korpusunda fərqli mövqelərdə sınaqdan keçirib. Ən yaxşı quruluşda qrafik kartının ən isti nöqtəsində temperatur 14°C, prosessorda 3,3°C azalıb. Başqa yerləşdirmədə qrafik kartındakı azalma 19°C-yə çatsa da, prosessor daha çox qızıb.    Müqayisə üçün əvvəlcə adi quruluş sınaqdan keçirilib. Prosessoru soyutmaq üçün 360 mm radiatorlu AIO, yəni qapalı dövrədə işləyən maye soyutma sistemi seçilib. 3 ventilyatorlu “RTX 3080” qrafik kartı da standart PCIe yuvasına taxılıb. Sistemə sabit yük salmaq üçün “3DMark Time Spy” dövrü ilə “7-Zip” proqramının daxili sınağı eyni vaxtda işlədilib. Nəticələr düzgün müqayisə olunsun deyə bütün sistem ventilyatorlarının sürəti dəyişdirilməyib.    Daha sonra qrafik kartı korpusun alt və yan hissəsində şaquli vəziyyətdə yoxlanılıb. Kartın fərqli istiqamətlərə çevrilməsi, eləcə də yan tərəfdəki 3 korpus ventilyatorunun önündə və arxasında yerləşməsi ayrıca sınaqdan keçirilib. Prosessorun maye soyutma radiatorundakı ventilyatorlar da havanı içəri çəkmək və çölə çıxarmaq üçün fərqli istiqamətlərdə işlədilib. Bəzi quruluşlar qrafik kartını, digərləri isə əsasən prosessoru daha yaxşı soyudub.    Yekun quruluşda əvvəlki sınaqların ən yaxşı nəticələri birləşdirilib. Qrafik kartı yan hava girişinin qarşısında şaquli yerləşdirilib. Prosessorun radiatoru da isti havanı korpusdan çıxaran ənənəvi mövqedə saxlanılıb. Qrafik kartı 14°C, prosessor 3,3°C daha sərin işləyib. Bu quruluşu sınamaq üçün qrafik kartını əsas PCIe yuvasından kənarda qoşan PCIe riser kabeli lazımdır.