Google-un 2-ci nəsil TV Streamer yayım qurğusu hazırladığı iddia olunur

    “Google” şirkətinin ikinci nəsil “Google TV Streamer” üzərində işlədiyi iddia olunur. Yeni yayım qurğusu əvvəlki modelə bənzəyəcək, amma bir qədər ensiz olacaq. Cihazın nə vaxt çıxacağı və neçəyə satılacağı hələ bilinmir. Gözlənilən yeniliklər onun funksiyalarını artıra bilər.    İndiki modelin uzunluğu 16,3 sm, eni 7,6 sm-dir. Qalınlığı 2,5 sm olan yeni qurğuda yalnız enin azalacağı deyilir. Əsas dəyişikliklərdən biri daxili mikrofonlar ola bilər. İstifadəçilər pulta toxunmadan “hey Google” deyib səsli əmrlər verə və süni intellektə sual ünvanlaya biləcəklər.    Cihazda otaqda insanın olub-olmadığını müəyyənləşdirən sensorun da olacağı deyilir. İstifadəçi otağa girəndə ekran qoruyucusu avtomatik açıla bilər. Kimsə qurğuya yaxınlaşdıqda ekranda saat və hava haqqında daha ətraflı məlumat görünə bilər. Beləcə, cihaz qismən ağıllı ekran kimi də işləyəcək.    Gözlənilən digər yeniliklər daha sürətli çip və daha geniş yaddaşdır. Yeni modeldə 32 GB yaddaşdan daha çox yer olacağı deyilir. Bu, daha çox tətbiq və fayl saxlamaq deməkdir. Pultda 2 əlavə qısayol düyməsinin olacağı da iddia edilir. Hazırkı pultda “Netflix” və “YouTube” üçün ayrıca düymələr var.    İlk “Google TV Streamer” 2024-cü ilin avqustunda satışa çıxıb. Həmin vaxt ayrıca “Chromecast” cihazlarının buraxılışı dayandırılıb. Hazırkı modelin ABŞ qiyməti bu yaxınlarda 149 dollara (təxminən 250 manat) qaldırılıb. Yeni cihazın nə vaxt göstəriləcəyi bilinmir. “Apple” şirkətinin də yaxın vaxtlarda yeni “Apple TV 4K” modelini göstərəcəyi iddia olunur. Buna görə “Google” yenilənmiş qurğunu çox gecikdirməyə bilər.