Apple iOS 27-də ev kameralarına AI xülasəsi və ağıllı axtarış gətirəcək

    “Apple” “iOS 27” ilə “Siri” üçün hazırladığı süni intellekt imkanlarını digər sistemlərinə də yaymağa başlayır. Yeniliklərdən biri “HomeKit” təhlükəsizlik kameralarının çəkdiyi videoları süni intellektlə qısa mətn şəklində xülasə etməkdir. “Apple Intelligence” qeydə alınan hadisələri izah edəcək və ayrı-ayrı görüntüləri eyni hadisə altında birləşdirəcək. Bunun üçün lazım olan “iCloud+” planı kamera sayından asılı olaraq ayda 59,99 dollar (təxminən 100 manat) ola bilər.    Sistem sifətin tanınması ilə videodakı tanış şəxsi müəyyən edib baş verənləri xülasədə göstərə bilir. İstifadəçi adi danışıq dilində sorğu yazaraq əvvəlki qeydləri axtara bilər. Oxşar videolar bir yerdə qruplaşdırıldığı üçün eyni hadisə ilə bağlı bildirişlərin sayı azalır. Bir neçə kameradan çəkilən görüntülər də ardıcıl hadisə kimi qiymətləndirilir.    Funksiya bütün “HomeKit” istifadəçilərinə açıq olmayacaq. Evdə 2-ci nəsil “HomePod”, “HomePod Mini” və ya “Apple TV 4K” cihazlarından biri olmalı, həmin cihaz da ən yeni əməliyyat sistemi ilə işləməlidir. Həmçinin “Apple Intelligence” dəstəkləyən “iPhone” lazımdır. Bunun üçün ən azı “iPhone 15 Pro” və ya daha yeni model tələb olunur.    Əvvəllər “HomeKit Secure Video” 50 GB, 200 GB və 2 TB həcmli “iCloud+” planlarında işləyirdi. Yeni süni intellekt funksiyası üçün 1 kamera üçün 2 TB yaddaş tələb olunur. Bu plan ayda 9,99 dollardır (təxminən 17 manat).    2-ci kamera əlavə ediləndə 6 TB-lıq plana keçmək lazımdır. Onun aylıq qiyməti 29,99 dollardır (təxminən 51 manat). 3, 4 və ya 5 kamera üçün 12 TB-lıq plan tələb olunur və bu paket ayda 59,99 dollara başa gəlir. İllik xərc 700 dolları (1190 manatı) keçə bilər. Üstəlik, bu yaddaş ailənin əsas bulud planından ayrıca hesablanır.    Xülasələri “iPhone”, “iPad” və ya “Mac” üzərindən qurmaq olur. İstifadəçi “Home” tətbiqində “Apple Intelligence” funksiyasını açıb kameraları ayrı-ayrılıqda seçə bilər. Tətbiqdə tanış sifətləri müəyyənləşdirmək və lazımsız bildirişləri azaltmaq da olur. Funksiya məcburi deyil və onu bütün kameralarda açmağa ehtiyac yoxdur. “Apple” qeyd edir ki, uyğun kameraların siyahısı və “iCloud+” şərtləri zamanla dəyişə bilər.