Proqramçı Adobe proqramlarına pulsuz və açıq mənbəli alternativ hazırlayıb

    Atlanta şəhərində yaşayan proqramçı Brandon Thomas “Claude Opus 5.5” süni intellekt modeli və “Rust” proqramlaşdırma dili ilə “Adobe Creative Suite” paketinə pulsuz alternativ hazırlayıb. Onun sözlərinə görə, “Photoshop”, “Illustrator”, “Premiere”, “Lightroom”, “Acrobat Pro”, “After Effects” və “InDesign” daxil olmaqla 7 tətbiqi yenidən qurub. “Artcraft” adlı paket ötən həftə “GitHub”da açıq mənbə kodu ilə yayımlanıb. Hər kəs tətbiqləri pulsuz endirə bilər.    Paketə “Photocraft”, “Vectorcraft”, “Filmcraft”, “Lightcraft”, “Printcraft”, “Effectcraft” və “Designcraft” daxildir. Bu proqramlarda uyğun “Adobe” tətbiqlərinə bənzər menyu və iş quruluşu yaradılıb. Məqsəd ayrı-ayrı pulsuz alətlər əvəzinə bütün yaradıcı proqramları vahid paketdə toplamaqdır. Thomas 1 ay ərzində proqramların funksiyalarını orijinallarla tam uyğunlaşdırmağı planlaşdırır.    Proqramları süni intellektlə idarə etmək də olur. JSON əsaslı nəzarət kanalı və MCP serveri süni intellektin menyu və alətlərə daxil olaraq birbaşa məzmun yaratmasına şərait yaradır. Bununla yanaşı, layihənin “Adobe” məhsullarını kopyaladığına dair iradlar səslənib və mümkün məhkəmə iddiaları gündəmə gəlib. Tərtibatçı proqramları sıfırdan yazdığını, “Adobe”un mənbə kodundan yararlanmadığını deyir.    “Photocraft” üzərində aparılan qısa sınaq göstərib ki, proqram işləyir, amma hələ çoxlu xətası var və tam hazır olmayan “Photoshop”u xatırladır. Alətlər gözlənilən bölmələrdə olsa da, seçilmiş hissəni dəyişmək üçün işlədilən “Free Transform” funksiyası bəzən əmri dayandırmayıb və edilən dəyişiklikləri özü ləğv edib. Buna baxmayaraq, sadə tapşırıqlarda proqram “Photopea” və “Gimp” kimi pulsuz alternativlərdən daha rahat görünüb. Thomas tətbiqlərin erkən alfa mərhələsində olduğunu və hələ istifadəyə hazır olmadığını deyib. O, xəta tapanlara mükafat da vəd edib.    Əsas narahatlıq yüz minlərlə sətir kodun cəmi 1 nəfər tərəfindən, süni intellektin köməyi ilə qısa müddətdə yazılmasıdır. 1100 mütəxəssisin qatıldığı 2026-cı il tarixli “State of Code Developer Survey” sorğusuna görə, proqramçıların 96%-i AI tərəfindən yaradılmış koda tam etibar etmir. Risklər arasında məxfilik problemləri, zərərli kodlar və faylların təhlükəli şəkildə işlənməsi var. Buna görə proqramları endirərkən ehtiyatlı davranmaq, mənbə kodu yoxlanılmadan vacib faylları bu tətbiqlərdə açmamaq məsləhətdir.    Layihə “Adobe”un abunə modelinə narazılığın davam etdiyi bir vaxtda ortaya çıxıb. Şirkət istehlakçıları onlara uyğun olmayan abunə planlarında saxladığı iddiası ilə 2024-cü ildə açılmış federal məhkəmə işi üzrə bu il 150 milyon dollarlıq razılaşmaya gedib (təxminən 255 milyon manat). Thomas özünü ödəniş sistemləri, robototexnika və optik avtomatlaşdırma sahələrində çalışmış, 15 illik təcrübəsi olan mütəxəssis kimi tanıdır. “Artcraft”ın real alternativə çevrilməsi çatışmayan funksiyaların tamamlanmasından və başqa proqramçıların layihəyə qoşulmasından asılıdır.