İstehsalçı 1,3 milyon TV qurğusunu yoluxdurub, Google şəbəkəni bağlayıb

    “Google” “XCPE” adlı botneti, yəni yoluxmuş cihazlardan qurulan şəbəkəni sıradan çıxarıb. Şəbəkəyə 1,3 milyondan çox TV qurğusu qoşulmuşdu. Bunların çoxu “Android TV” və “Google TV” sistemli yayım qutuları idi. Hadisənin əsas fərqi odur ki, zərərli proqramı cihazlara istifadəçi yox, istehsalçı qəsdən yerləşdirib.    Araşdırmaya görə, şəbəkənin arxasında Çində yerləşən “Videostrong Technology” şirkəti dayanıb. İstehsalçı cihazlara gizli giriş yaradan arxa qapını onların daxili proqramına əlavə edib. Bu üsul illərlə müxtəlif marka və modellərdə işlədilib. Şirkətin rəsmi sertifikatı olsa da, yoxlamalardan yayınmaq üçün kodu gizlədib. İlk açılışdan sonra yüklənən zərərli kod sertifikat yoxlaması zamanı buna görə aşkarlanmayıb.    Arxa qapı cihaz işə düşəndən sonra sahibinin xəbəri olmadan başqa zərərli proqramları endirə bilirdi. “Videostrong Technology” yoluxmuş cihazlara girişi cinayətkar qruplara satırdı. Həmin qruplar ev internetindən öz trafiklərini gizlətmək, reklam fırıldaqları törətmək, məlumat oğurlamaq və hesabları ələ keçirmək üçün yararlanırdı. Cihazlar DDoS hücumlarında, yəni serverləri həddən artıq sorğu ilə çökdürmək üçün də işlədilirdi. Zərərli proqram silinsə belə, cihaz yenidən başladıqda arxa qapı onu təkrar qura bilirdi.    Problem təkcə TV yayım qutularında aşkarlanmayıb. Eyni üsul teletibb cihazlarında, karaoke avadanlıqlarında və rəqəmsal reklam ekranlarını idarə edən qurğularda da tapılıb. İdarəetmə serverlərinin bağlanması ən azı 10 milyon əlavə cihazla əlaqəni kəsə bilər. Ancaq serverlərin sıradan çıxarılması cihazlarda qalan zərərli kodun avtomatik silinəcəyi demək deyil.    “Google” hüquqi addımlar ataraq botneti idarə edən domenləri və serverləri bağlayıb. Əməliyyata Yaponiya Milli Polis Agentliyi, “Lumen”, “HUMAN Security”, “Plume”, “Synthient” və “TrendAI” da qoşulub. Bağlanan domenlər “XCPE” üzərindən yayılan 12-dən çox zərərli proqram qrupunu idarə edirdi. “Videostrong Technology”, onun törəmə və əlaqəli şirkətlərinə sertifikatlı “Android” cihazları və bu istehsalçılar üçün proqram hazırlamaq qadağan edilib.    Hadisədən sonra “Google” sertifikatlı “Android TV” cihazlarının daxili proqramlarını yoxlama qaydalarını sərtləşdirib. İlk işə salınmadan sonra kod endirməyə şərait yaradan boşluğu bağlamaq üçün təsdiq prosesi də yenilənib. İstifadəçilərə “Google Play Protect” funksiyasını açıq saxlamaq və etibarlı istehsalçıların cihazlarını seçmək məsləhət görülür. “Videostrong Technology” istehsalı cihazı olanlara isə onu internetdən ayırmaq və dəyişdirmək tövsiyə edilir.