Fujifilm maqnit lenti istehsalını 5 qatadək artıracaq: tutum 100 TB olacaq

    “Fujifilm” süni intellekt məlumat mərkəzlərinin artan yaddaş ehtiyacını qarşılamaq üçün maqnit lenti istehsalını 5 dəfəyədək artırmağı planlaşdırır. Yaponiya şirkəti layihəyə 10 milyard yen yatıracaq. Bu, 63,3 milyon dollar (təxminən 107,6 milyon manat) deməkdir. Genişləndirmə işləri 2028-ci maliyyə ili ərzində aparılacaq. Bu, şirkətin lent yaddaşına son 20 ildə qoyduğu ən böyük sərmayə olacaq.    İstehsal gücü “Fujifilm”in Odawara zavodunda artırılacaq. Yeni xətlərdə hər lentə 100 TB-yə qədər məlumat yazıla bilən daha qabaqcıl məhsullar hazırlanacaq. Şirkət maqnit lenti texnologiyası üzərində 1954-cü ildən işləyir. Həmin dövrdə bu lentlər televiziya yayımı avadanlıqlarında işlədilirdi. İndi əsas alıcılar məlumatların uzunmüddətli ehtiyat nüsxələrini saxlayan məlumat mərkəzləridir.    Maqnit lentləri məlumatı SSD-lərdən və sərt disklərdən daha yavaş oxuyur. Ancaq uzun müddət saxlanılan və nadir hallarda açılan fayllar üçün daha ucuz, həm də davamlı seçim sayılır. Bəzi hallarda lent yaddaşının xərci sərt diskin qiymətinin cəmi 25 faizi qədər olur. SSD-lərlə qiymət fərqi daha da böyükdür. Buna görə vacib, amma gündəlik açılmayan məlumatların arxivləşdirilməsində maqnit lentlərinə üstünlük verilir.    LTO standartının inkişaf planına görə, gələcəkdə bir kartricdə 365 TB-yə qədər məlumat saxlamaq olar. “Fujifilm” hələlik 100 TB tutumlu lentlərin istehsalına hazırlaşır. Müqayisə üçün, ən böyük SSD modelləri təxminən 256 TB tutumludur və xeyli baha başa gəlir. Araşdırmalar lent yaddaşının sərt disklər və SSD-lərlə müqayisədə ətraf mühitə daha az zərər vurduğunu da göstərir.    Süni intellekt məlumat mərkəzlərinin yaratdığı tələbat başqa istehsalçıların planlarına da təsir edir. “Toshiba” sərt disk istehsalını 2 dəfə artırmağa hazırlaşır. “Seagate” və “WD” daha böyük tutumlu disklər üzərində işləyir. “Kioxia” və “SanDisk” məlumat mərkəzləri üçün hazırlanan daha tutumlu SSD-lərdə 332 qatlı 3D NAND yaddaş işlətməyi planlaşdırır. Qlobal çatışmazlıq qiymətləri artırıb və istehsalçıları adi istifadəçilər üçün məhsullardan daha gəlirli korporativ bazara yönəldib.