DoorDash ərzaq çatdırılması xidməti Instacart-ı 17 milyard dollara alacaq

    “DoorDash” 29 oktyabrda onlayn ərzaq çatdırılması xidməti “Instacart”ı alacağını açıqlayıb. Razılaşmanın dəyəri təxminən 17 milyard dollardır (təxminən 28,9 milyard manat). Ödəniş nağd pul və səhmlərlə ediləcək. Şirkət hər səhm üçün 65 dollar (təxminən 110 manat) ödəyəcək. Bu addım “DoorDash”ın onlayn ərzaq bazarındakı mövqeyini xeyli gücləndirəcək.    Razılaşmanın 2027-ci ilin sonunadək və ya 2028-ci ilin ilk yarısında tamamlanacağı gözlənilir. Bunun üçün səhmdarlar və tənzimləyici qurumlar razılıq verməlidir. Proses bitənədək şirkətlər ayrı-ayrılıqda işləyəcək. Daha sonra “Instacart” brendi, tətbiqi və şirkətlər üçün hazırlanan texnoloji məhsulları saxlanılacaq.    “DoorDash”ın çatdırılma şəbəkəsi “Instacart”ın geniş ərzaq seçimi və sifariş hazırlama texnologiyası ilə birləşdiriləcək. Müştərilər 50 000 əlavə mağazaya çıxış qazanacaqlar. Mağazalar çatdırılma, reklam və süni intellekt (AI) əsaslı alətlərdən həm şirkətlərin tətbiqlərində, həm də öz saytlarında yararlana biləcək. Məqsəd kiçik pərakəndə satıcıların “Amazon” və “Walmart”la rəqabətini asanlaşdırmaqdır.    Razılaşmadan sonra “DashPass” və “Instacart Plus” üzvləri 2 ayrı ödəniş əvəzinə vahid abunə haqqı ödəyə biləcəklər. Yeni abunənin adı və qiyməti hələ açıqlanmayıb. 2018-ci ildə çıxan “DashPass”ın aylıq qiyməti 9,99 dollardır (təxminən 17 manat). Abunəyə limitsiz pulsuz çatdırılma daxildir. “Instacart Plus” ayda 9,99 dollara satılır. İllik abunə 99 dollardır (təxminən 170 manat). Xidmət 35 dollardan (təxminən 60 manat) yuxarı sifarişləri pulsuz çatdırır və daha aşağı xidmət haqqı tutur. Həmçinin ödənilən məbləğin 5 faizi geri qaytarılır.    Yerli ərzaq mağazaları yalnız 1 platforma ilə işləməyə məcbur edilməyəcək. Onlar hər iki xidmətdən yararlana biləcəklər. “Instacart” sifarişlərini hazırlayan şəxslər iş saatlarını və qəbul edəcəkləri sifarişləri yenə özləri seçəcəklər. İstəsələr, “DoorDash” sifarişlərini də götürə və ya yalnız “Instacart”la işləyə bilərlər. Çatdırılma tərəfdaşları hər iki platformadan gələn sifarişləri birləşdirə biləcəklər.    İşə restoran sifarişlərini çatdırmaqla başlayan “DoorDash”ın artıq öz ərzaq çatdırılması xidməti də var. Şirkət bu sahədə “Instacart”, “Uber”, “Amazon” və “Walmart”la rəqabət aparır. “DoorDash” və “Instacart” birləşmə məsələsini 2021-ci ildən müzakirə edirdi. “Instacart” 2023-cü ildə birjaya çıxıb. Hər iki şirkət 2024-cü ildən qazanc əldə etməyə başlayıb.